Pas rreth 50 seancave të mbajtura për rastin “Tortura” sot gjykata, në vend se të sjellë aktgjykim për Sasho Mijallkov dhe 6 ish-pjesëtarët e njësitit “Alfa”, vendosi që lënda të rihapej përsëri.
“Gjatë momentit ekziston pengesë faktike për sjellje të një vendimi meritor nga ana e trupit gjykues”, tha Aleksandra Ristovska, gjykatëse.
Gjykatësja Ristovska vlerëson se aktakuza nuk është e qartë dhe nuk ka prova të mjaftueshme se kush nga të akuzuarit çfarë veprimi ka ndërmarrë gjatë arrestimit jonjerëzor të Lube Boshkovskit.
“Nga të gjitha dëshmitë e paraqitura në seancën kryesore për gjykatën është e pakontestueshme se ka ndodhur një ngjarje e caktuar, por nuk është e qartë plotësisht se kush nga të akuzuarit cilën vepër kanë ndërmarrë dhe cili është kontributi i rëndësishëm drejt kryerjes së veprës”, shtoi Ristovska.
Për precizim të lëndës, Ristovska kërkoi dëshmi shtesë nga prokurori Lubomir Lape. Por për prokurorin akuza është qartë dhe e saktë, ndërsa u shpreh i habitur nga ky vendim i gjykatës.
“Gjykata nuk na angazhoi as mua, e as palën mbrojtëse, me ndonjë veprim ose dëshmi shtesë të reja që duhet t’i propozojmë. Pres në vendimin e shkruar që gjykata të vendos se çka është e nevojshme të ndërmerret, ndërsa unë të them sinqerisht prisja aktgjykim dënues dhe jam pak i befasuar nga ky vendim”, u shpreh Lape.
E nga ana tjetër pala mbrojtëse e Mijallkovit po priste një aktvendim lirues, por edhe rihapjen e lëndës e sheh si akt ligjor.
“Vetë trupi gjykues, nëse e dëgjuat me kujdes, dhe e dëgjonit, shprehu dyshimin se shkaku që faktet nuk ishin vërtetuar në mënyrë që pa mëdyshje i kanë dhënë atij të drejtën të vendosë në mënyrë të ligjshme dhe korrekte, e kjo për shkak të paqartësisë së veprimeve të kryerjes, unë prisja që trupi gjykues sot të lëshonte një aktgjykim lirimi”, tha avokati, Lupço Shvrgovski.
“Tortura” do të ishte lënda e katërt për të cilën do të dënohej ish-shefi i policisë sekrete, Sasho Mijallkov. Ndërkohë Mijallkov deri tani është dënuar me 12 vjet burg për përgjimin masiv në rastin “Target-Fortesa”, për “Thesari-n” 8 vjet, për keqpërdorim të parave të shtetit në prokurimin e pajisjeve për DSK-në, gjithashtu u dënua me burg për parregullsi zgjedhore në rastin “Titanik 2”, por ky rast është kthyer në rigjykim.