Ankesa të shumta për mashtrim nga kreditë e shpejta/ S’kanë norma interesi, por kanë kosto të tjera

Gjithnjë e më të shpeshta janë denoncimet që bëhen në Organizatën për Mbrojtje të Konsumatorëve se janë manipuluar nga pronarët e subjekteve që ofrojnë “kredi të shpejta”.

“Pohojnë se gjatë aplikimit nuk marrin informacione të qarta dhe transparente për atë që duhet ta kthejnë. Më së shpeshti edhe reklamat që i shohim thonë se do të merrni një shumë të caktuar parash dhe nuk do të paguani normë interesi, por megjithatë ka shpenzime të caktuara që nuk janë norma interesi, por shpenzime dhe ato me të vërtetë nuk janë të ulëta. Prandaj qytetarët reagojnë.”- deklaroi Tatjana Tasevska, këshilltare juridike në OMK.

Konsumatorët më të shpeshtë të kredive të shpejta janë kategoritë në rrezik social, thonë nga Organizata për Mbrojtjen e Konsumatorëve. Për shkak se kanë më shumë borxhe nuk mund të marrin kredi nga bankat e tjera, u kërkohen dokumente që nuk mund t’i sigurojnë ose nuk janë të punësuar, prandaj vendosin të marrin kredi të shpejta, ku procedura për marrjen e tyre është më e thjeshtë.

“Ndonjëherë madje s’ka nevojë të jeni fizikisht të pranishëm, sepse e gjithë procedura bëhet online. Të dërgojnë një kontratë dhe ti e firmos shpejt e shpejt. E gjithë kjo procedurë kryhet shumë shpejt. Por, qytetarët “e uritur” për para nënshkruajnë këto marrëveshje, por më vonë ndodhin probleme kur paratë duhet të kthehen. Për shkak të pamundësisë për kthimin e tyre në kohë, nuk paguhet normë interes, por paguhen kosto të tjera.”- pohoi Tatjana Tasevska, këshilltare juridike në OMK.

Me ndryshimet ligjore që i përgatiti Ministria e Financave para katër vjetëve, u reduktuan kostot e larta për kredi të shpejta. Kostoja e përgjithshme vjetore për një kredi konsumatore është kufizuar në 55% të kredisë. Më parë kostot vjetore nuk ishin të kufizuara dhe arrinin deri në 500%. Me ndryshimet, janë përfshirë edhe kreditë e vogla nën 200 euro. Për shembull, për një kredi prej 12.000 denarëve për dy-tre muaj, qytetarët duhej të kthenin deri në 36.000 denarë.