Prokuroria Publike Themelore për Përndjekje të Krimit të Organizuar dhe Korrupsionit, njoftoi se kanë dorëzuar aktakuzë kundër katër personave për blerjen e 202 autobusëve kinezë me dy kate. Siç informojnë, ata akuzohen për keqpërdorim të detyrës zyrtare dhe autorizimit që është në kundërshtim me Ligjin për Furnizime Publike. Ata e kanë favorizuar operatorin nga Kina, dhe me këtë, siç thonë nga Prokuroria, kanë realizuar përfitim dhe e kanë dëmtuar buxhetin shtetëror për 4.772.920 euro. I akuzuari i parë është Mile Janakieski, i cili aso kohe ishte ministër i Transportit dhe Lidhjeve, kurse i akuzuar është edhe Igor Janushevi i cili ishte drejtor i Ndërmarrjes Qarkulluese Publike. Siç shpjegojnë nga Prokuroria, pas tre procedurave të pasuksesshme për blerjen e autobusëve dykatësh që janë zbatuar gjatë vitit 2008 dhe 2009, në shkurt të vitit 2010 është zbatuar procedurë e re për furnizim publik. Gjatë shqyrtimi të ofertave, të akuzuarit kanë vepruar në kundërshtim me Ligjin për Furnizime Publike dhe kanë favorizuar operatorin ekonomik i cili deri në hapjen e ofertave nuk ka dorëzuar garanci bankare dhe certifikatë për cilësi, siç është shkruar në dokumentacionin e tenderit. Komisioni në vend që ta hedhë poshtë ofertën, për shkak se nuk ka qenë e kompletuar, ka vazhduar me procedurë dhe ka bërë vlerësimin e dy ofertave të dorëzuara. Edhe pse oferta e operatorit ekonomik nga Bullgaria ka qenë për 4.7 milion euro më e ulët, komisioni ka zgjedhur operatorin nga Kina dhe të akuzuarit të parë i ka propozuar të lidhë marrëveshje me të. Siç dihet, autobusët kinezë me dy kate ishin blerë gjatë Qeverisë së VMRO-DPMNE-së të udhëhequr nga Nikolla Gruevski. Dërgesa e parë e këtyre autobusëve ka mbërritur në vitin 2011./TV21
TË FUNDIT
