Ahmeti: Zgjidhje deri në fund të qershorit/ Sofja dërgon në Shkup Draft-Protokollin bilateral

Propozimi francez për zgjidhjen e kontestit mes Maqedonisë së Veriut dhe Bullgarisë vazhdon të shkaktojë përplasje politike te të dyja palët. Në Bullgari, propozimi i është dorëzuar Komisionit për politikë të jashtme në Kuvend dhe pritet që i njëjti të shqyrtohet dhe të dilet me qëndrim. Ndërkohë nga kuvendi bullgar njoftuan se Ministria e Jashtme e ka dërguar draft protokollin dypalësh mes Sofjes dhe Shkupit, si rezultat i bisedimeve mes dy vendeve.

“Ky është propozimi më serioz që deri më tani e ka marrë Bullgaria si zgjidhje për kontestin me RMV-në. Për shkak se, për herë të parë, propozohet që bullgarët të futen të Kushtetutën e RMV-së, për të pasur pozitë bullgare të fortë dhe të unifikuar”- deklaroi Nadezhda Nejnski, ish-MPJ i Bullgarisë.

Bullgarisë për momentin i duhen zgjedhje, komentoi zëvendësja e presidentit bullgar. Ajo tha se tani duhet të dilet me qëndrim me të cilin Bullgaria do të udhëtojë në Bruksel në lidhje me problemin me Maqedoninë.

“Unë personalisht jam e njoftuar për dy dokumente, të ashtuquajturin protokoll të përbashkët për të dyja palët që ende nuk e njoh, kështu që nuk mundem ta komentoj. Ky dokument është më i rëndësishëm prej këtyre dokumenteve,  krahas kornizës negociuese dhe propozimit francez”- pohoi Iliana Jotova, zëvendëse e presidentit të Bullgarisë.

Kreu i BDI-së, Ali Ahmeti u shpreh optimist se deri në fund të qershorit do të gjendet zgjidhje dhe se do të ketë epilog në favor të paqes, stabilitetit dhe të ardhmes.

Në takim të rregullt të ministrave të jashtëm të BE-së që do të zhvillohet sot, pritet që të bisedohet edhe për propozimin francez për zgjidhjen e kontestit mes Maqedonisë dhe Bullgarisë. Nesër në Bullgari votohet mocion besimi i Qeverisë.