Lufta brenda BDI-së siç duket po bëhet edhe më e nxehtë. Derisa Grupi i Zjarrit kërkon heqjen e disa ministrave nga ekzekutivi, lideri i partisë lëre që nuk po i dëgjon, por tani siç mëson TV21, Ahmeti ka vendosur që Bujar Osmani të jetë koordinator i proceseve politike në degën e Çairit. Në këtë mënyrë kjo nënkupton marrje të kompetencave të Izet Mexhitit si kryetar i degës së BDI-së në Çair.
TV21 pyeti Mexhitin se a do të thotë kjo përjashtim nga partia!? Ai u përgjigj shkurt:
“Mirë është zotëri Ahmetin ta pyesni për këto diferencime politike dhe tendencën për heshtjen e mendimit ndryshe! Sepse, ky është edhe një vendim jostatutar, që nuk ka kaluar në organet partiake”, tha Izet Mexhiti, nënkryetar i BDI-së.
Në tubimin që patën Grupi i Zjarrit me banorët e Çairit, Mexhiti duke folur për shkarkimin e zv/ministrave dhe drejtorëve që janë mbështetës “të zjarrit” dhe zëvendësimin me kuadro të Aleancës, pyeti se në zgjedhjet e ardhshme kush do t’ia sigurojë votat në Çair.
“Po i bëj pyetje kush do t’i mbledh votat për BDI-në? Për kë do të punojnë ato zv/ministra dhe drejtor që emërohen nga kjo Qeveri. Në ditën e zgjedhjeve do të punojnë ato për BDI-në apo për subjektin e tyre. Prandaj mos harroni se me votat tona janë nëpër ato kolltukë, me votat tona janë ministra”, deklaroi Izet Mexhiti, nënkryetar i BDI-së.
Nga ana tjetër Artan Grubi para disa ditëve në Click Plus duke sqaruar se nga nisën plasaritjet në BDI, në një moment tha se Beqir Asani ka qenë njëri nga kryetarët më të suksesshëm në degën e Çairit.
“Dhe në kohën kur ndodhi kjo në vitin 2016/2017 kur refuzoi të bëhet kryetar komune, dhe e propozuam Visar Ganiun dhe kishim një situatë katrahurë ku lidershipi lokal në Çair, thjesht s’kishim degë, sepse ish-kryetari ishte larguar nga politika vendosi që mos të merret me politikë dhe mbeti dega e Çairit pa kokë, pa njeri, e shpartalluar. Për Beqën e keni fjalën? Po, ishte jashtëzakonisht i suksesshëm. Nuk kishte një proces zgjedhor që nuk e kishte fituar në Çair”, tha Artan Grubi – BDI.
Ndryshe vendimi i Ahmetit për Bujar Osmanin si koordinator në Çair, vjen pas një periudhe të tensionuar në parti, e cila është ndarë në dy grupime, ata që janë funksionarë në Qeveri e të cilët mbështeten nga kryetari Ahmeti, si zëvendëskryeministri Artan Grubi dhe ministri i jashtëm Bujar Osmani, si dhe grupi i ashtuquajtur “i zjarrit”, të udhëhequr nga Izet Mexhiti, Musa Xhaferi e Blerim Bexheti, të cilët kritikojnë punën e ministrave integristë.