Abazoviq në takim zyrtar në Maqedoninë e Veriut! “Bashkëpunimi ekonomik, çelësi për zhvillim rajonal”

I lindur në Ulqin të Malit të Zi, Dritan Abazoviq, është politikani i cili theu tabunë se edhe një shqiptar mund të udhëheqë një funksion të lartë në shtetin ku ka lindur dhe jeton. Ai tani është zëvendëskryeministër në Qeverinë e Malit të Zi.

Votat e partisë së tij ishin vendimtare për formimin e Qeverisë malazeze, dhe pas 30 viteve  Partia Demokratike Socialiste e Millo Gjukanoviqit, u largua nga pushteti.

Sot Dritan Abazoviq  ishte në vizitë zyrtare në vendin tonë me ftesë të homologut të tij përgjegjës për Çështje Ekonomike, Fatmir Bytyqi. Përveç temave të ndryshme ekonomike, dy zëvendëskryeministrat biseduan edhe për procesin e minishengenit. Abazoviq tha se përkundër minishengenit,  prioriteti i të gjitha shteteve duhet të jetë anëtarësimi në Bashkimin Evropian.

 “Ne nuk kërkuam zëvendësim për integrimet evropiane, prioriteti i të gjitha shteteve duhet të jetë anëtarësimi në Bashkimin Evropian. Në këtë moment mendojmë se derisa të gjitha shtetet të kryejmë të gjitha obligimet të shihet modeli se si mundet një kooperim rajonal të jetë më i fuqishëm dhe më i suksesshëm dhe të jap rezultate konkrete në këto shtete. Gjithë bisedimi ka qenë në lidhje për një bashkëpunim rajonal. Besoj se ekzistojnë shumë sektorë ku mundemi me pas një përmirësim”, tha Dritan Abazoviq – zëvendëskryeministër i Malit të Zi.

Bytyqi dhe Abazoviq kanë vlerësuar se ardhmja e Ballkanit perëndimorë qëndron pikërisht në bashkëpunimin ekonomik.

 “Ne folëm dhe u morëm vesh që në periudhën e ardhshme të marrim hapa akoma më të qarta rreth krijimit ose operacionalizmit të asaj që e kemi nënshkruar në muajin nëntor gjatë procesit të Berlinit të krijimit të tregut të përbashkët. Ne folëm për aktivitetet që duhet të ndërmarrin të dy Qeveritë në periudhën post-covid të punës që na pret për zhvillimin e asaj që unë e quaj konkueruentshmëri rajonale  për kundrejt konkurrimit rajonal që mendoj se është baza e zhvillimit të mirëfilltë dhe të qëndrueshëm të Ballkanit perëndimor”, theksoi zëvendëskryeministri për Çështje Ekonomike, Fatmir Bytyqi.

Gjatë vizitës Abazoviq u takua edhe me kryetarin e Kuvendit, Talat Xhaferi, me zëvendëskryeministrin e parë, Artan Grubi, si dhe me ministrin e Punëve të Brendshme, Oliver Spasovski.