A e kryen obligimin e tyre qytetarët dhe autoritetet? Sanksione për mospastrimin e borës para shtëpive dhe dyqaneve

A ishin të gatshme apo u befasuan autoritetet nga dëbora? I pyetëm qytetarët se sa janë të kënaqur nga ajo se si autoritetet menaxhuan me situatën!? A e kryen edhe ata obligimin e tyre që të pastrojnë borën para shtëpive apo objekteve afariste?

“Nëse çdo kush e pastron, nuk do të kishin aq punë as punonjësit e komunales”.

A e kanë kryer punën autoritetet?

“Shumë bukur, shumë bukur…Obligimi i gjithsecilit është të pastrojë para oborrit të vet”.

“Secili ka për obligim të pastrojë para dyqanit, për pjesën tjetër shihet. Rrugët po, por trotuaret nuk janë të pastruara”.

“Pjesërisht, e zakonshme apo! Mendoj se nuk është e thjeshtë të pastrohet ashtu siç duam, posaçërisht kur e dimë se po bie borë më shumë se zakonisht, po mundohen. Unë jetoj më larg, dhe pastrova, e kisha patjetër, kush të pastrojë”!

“Aspak nuk janë pastruar. Tash sapo u rrëzova, shiko! Shilegov nuk e ka pastruar, më së shumti po rrëzohen më të moshuarit”.

Përderisa po anketonim kalimtarë të rastit takuam inspektorë të cilët ndanin njoftime pronarëve të objekteve afariste se nëse nuk e pastrojnë borën vijojnë sanksione. Kjo vlen edhe për personat fizik të cilët duhet të pastrojnë hapësirën para shtëpisë së tyre.

 “Inspektorët komunalë dhe nëpunësitë komunalë të Qytetit të Shkupit janë në terren dhe vazhdimisht e ndjekin pastrimin e hapësirave publike dhe hapësirës para subjekteve juridike, hyrjeve të ndërtesave dhe dyqaneve. I edukojnë dhe i obligojnë që ta kryejnë obligimin e tyre ligjor për ta pastruar borën para dyqaneve dhe hyrjeve. Nëse nuk veprojnë sipas obligimeve, Inspektorati i Qytetit të Shkupit do t’u shqiptojë gjobë sipas Ligjit për higjienë publike, neni 22, në lartësi prej 1000 eurove për personat juridike dhe 100 eurove për persona përgjegjës”, theksoi Valon Salihu – Zëdhënës i Qytetit të Shkupit.

Nga pastrimi i borës varët lëvizja e sigurte e qytetarëve. Duket se më të moshuarit si çdo vit tjetër më së shumti i ndjenë pasojat të cilat ndonjëherë mbarojnë me fraktura. Ja se si është gjendja këto ditë:

“Në 48 orët e fundit me ndryshimin e kushteve të motit dhe me reshjet e borës në Shkup dhe në rrethinë, Ndihma e parë shënon rritje të intervenimeve. Të shtunën kishim tre thirrje,  ndërsa të dielën  dy. Mosha e pacientëve lëviz prej 60 deri në 90”, potencoi Milica Buballo – Udhëheqëse në ndihmën e parë.

Nga Ndihma e shpejtë rekomandojnë kujdes gjatë lëvizjes apo qëndrim në shtëpi nëse nuk dalja është e patjetërsueshme, siç kërkon edhe e gjithë situata këtë vit.