Alternativa do të presë që 100% të përfundojnë negociatat mes Aleancës për shqiptarët dhe kryeministrit Kovaçevski që më pas partia e Gashit të merr vendim nëse qëndrojnë apo dalin nga Qeveria. Gashi shtoi se në tërësi duhet të shohin nëse marrëveshja mes ASh-së dhe partnerëve të koalicionit prek marrëveshjen që ka Alternativa me mandatarin e Qeverisë.
“Mendimi i kryetarit të partisë nuk mundet të jetë personal. Unë e bëj detyrën time që të krijojë alternativa të mira, d.m.th. t’i analizojmë të dy opsionet, çfarë nëse hymë dhe çfarë nëse dalim dhe duhet t’i shtrojmë për diskutim në organet tona dhe si shumicë të vendosim”, tha Afrim Gashi, kryetar i Alternativës.
Gashi nuk deshi të komentojë as çka do të ndodhë nëse Alternativës i merret ministria e Shëndetësisë.
“Në pyetje hipotetike nuk kisha dashur të përgjigjem. Mbetet çështje e hapur, do të duhet ne ta diskutojmë pakon komplet, nuk bëhet fjalë për një resor ose dy”, pohoi Afrim Gashi, kryetar i Alternativës.
Politika është kompromis dhe ne jemi të gatshëm për kompromis, por duhet parë se sa shkelet dinjiteti i Alternativës nga marrëveshja ASh-Qeveri, shtoi Gashti
“Ne me ASh-në kemi pasur raporte të mira. Kemi pasur koalicion të përbashkët, kemi ruajtur raportet e mira dhe nëse ata vendosin t’i bashkëngjiten shumicës, natyrisht nëse edhe ne mbetemi aty do gjejmë kanale të komunikimit për shkak se i kemi ato dhe do të bashkëpunojmë edhe ashtu Alternativa është parti bashkëpunuese më të gjithë”, tha Afrim Gashi, kryetar i Alternativës.
Këto deklarata Gashi i tha dje pas takimit që pati me anëtarësinë e partisë në Gostivar ku është diskutuar mbi gjendjen politike në vend.