Komuna e Çairit nuk e di se kush është pronari që po e ndërton objektin te kafeneja “Fontana” në qendrën tregtare “Mavrovasja”. Për këtë, prej nesër do të nxjerr njoftimin në gazeta ditore dhe në gazetën zyrtare që të njoftojnë pronarin, se ndërtimi është ilegal dhe se duhet të rrënohet. Nëse për 8 ditë pronari nuk e rrënon ndërtimin, atëherë do ta rrënojë komuna. Deri atëherë komuna do të hapë edhe tender për realizimin e rrënimit i cili zgjat 40 ditë.
“Në afat prej tetë ditësh ai duhet ta rrënojë vetë objektin. Nëse nuk e rrënon, atëherë do të merr masa komuna. Por, paralelisht dua të ju njoftoj, se nga dita e hënë Komuna do të shpall tenderin e ri apo shpalljen publike për rrënimin e objektit për shkak se për momentin e ka të skaduar”, deklaroi Visar Ganiu, kryetar i Komunës së Çairit.
Kjo do të thotë se edhe nëse pronari nuk e respekton afatin 8 ditor, objektin nuk do të mund ta rrënojë as Komuna, sepse nuk ka kompani që e kryen këtë. Por Ganiu shpreson se pronari do të reflektojë.
“Ne presim dhe jemi të bindur… tash dëshirojmë që investitori vetë ta rrënojë objektin”, tha kryetari i Komunës së Çairit, Visar Ganiu.
“Edhe pse gjatë periudhës paraprake punimet u realizuan në mënyrë intensive, sot nuk shihen punëtorë. Duket se pronari i ka ndërprerë punimet”, Fatbardha Curri, gazetare.
Mbetet të shihet se nëse pronari gjatë 8 ditëve do ta rrënojë vetë objektin apo këtë do të duhet ta bëjë vetë komuna. Afati ligjor prej 8 ditësh fillon prej nesër dhe kjo procedurë po zhvillohet kështu për shkak se pronari nuk është i njohur, sepse inspekorët gjatë inspektimit nuk e kanë gjetur të njëjtin dhe për këtë s’kanë mundur ta identifikojnë.