2 milionë eurot e premtuara për Kërçovën, të destinuara për realizimin e projekteve infrastrukturore

Të shumta ishin zotimet dhe premtimet në fushatën zgjedhore në Kërçovë, por më e veçanta që u dëgjua ishte ajo e ministrit të transportit Aleksandar Nikollovski, i cili premtoi 2 milionë euro nëse në krye të Kërçovës vjen kandidati i VMRO-DPMNE-së Aleksandsr Jovanovski.

“Ne nuk do të ndalemi këtu vazhdojmë, komuna nga thirrja e dytë që e publikoi qeveria ka ndarë mbi 2 milion euro për Komunën e Kërçovës për një sërë projektesh që do të realizohen në të gjitha vendbanimet dhe dua të them se pas fitores së dr. Aleksandar do të ketë mjete shtesë nga Ministria prej 2 milionë eurosh për komunën e Kërçovës”, tha Aleksandar Nikollovski.

Jovanovski e fitoi garën! E pyetëm se a po realizohet premtimi i ministrit Nikollovski.

“Zotëri Nikollovski ministër i Transportit dhe Lidhjeve pas asaj deklarate edhe disa herë ka qenë na ka vizituar ashtu jozyrtarisht dhe në të gjitha bisedat tona më ka konfirmuar mbështetje të pa rezervë dhe jo vetëm ato 2 milionë euro të cilat i premtoi publikisht, por na motivoi që sa më shumë projekte të punojmë, projekte kapitale ose projekte të mëdha 2 milionë euro, 1 milionë e gjysmë nëse ata projekte realizohen ne do te kemi mbështetje nga Ministria e Transportit dhe Lidhjeve dhe nuk do të jemi të kufizuar vetëm me atë shumë 2 milionë euro”, deklaroi Aleksandsr Jovanovski.

Të pyetur se si do ta realizojnë këtë, nga kabineti i Ministrit, na u përgjigjën se “nëpërmjet një programi të veçantë, ashtu siç njoftoi edhe zëvendëskryeministri dhe ministri i Transportit, Aleksandar Nikolloski, në buxhetin për vitin 2026 do të ndahen mjete për komunën e Kërçovës, të destinuara për realizimin e projekteve infrastrukturore”. Përfundojnë duke thënë se zhvillimi ekonomik dhe infrastrukturor i Kërçovës është me rëndësi të veçantë për përmirësimin e cilësisë së jetës së banorëve të kësaj komune, dhe në këtë drejtim do të mbështeten projektet që sjellin përfitime për qytetarët e Kërçovës.