Reagime dhe pakënaqësi të shumta për ndarjen e buxhetit për projektet e kulturës me interes nacional për vitin 2021. Azam Dauti nga shtëpia botuese “Shkupi” ka aplikuar për mbështetje për botimin e 10 librave, prej të cilëve 8 i janë refuzuar, ndonëse përzgjedhjen e kanë bërë me kujdes ndërsa edhe dokumentacioni po ashtu ka qenë i plotë.
“Nuk është çështja e kuantitetit. Çështja është që ne për të parën herë dëshiruam që me këto 10 tituj të përzgjedhur, Ministria e Kulturës të mos ketë shanse që të mos e përkrahë sepse është projekt që qeveria e mëparshme por edhe e tashme për projekte të këtilla kanë dhënë edhe nga 50 mijë euro për libër nëpër ato tenderët e kurdisur që i kishin”, tha Azem Dauti – SH.B “Shkupi”.
Kjo shtëpi botuese po ashtu është refuzuar edhe për pjesëmarrje në 4 panaire rajonale e ndërkombëtare. I befasuar nga refuzimi ka mbetur edhe Mevaip Abdiu, drejtor i festivalit për fëmijë “Bletëzat”. Mbështetja që ka marrë nga Ministria thotë se ka qenë simbolike, me 100 deri 150 mijë denarë, por sivjet e kanë lënë pa asnjë denarë.
“Këtë vit nuk është përkrahur nga ministria e kulturës, edhe pse nuk kemi ndonjë vendim zyrtar, me pretekstin se këtë vit mjetet janë shumë më të pakta shkaku i pandemisë dhe ajo që unë kam informacion, vetëm 16% e mjeteve të ndara janë për projektet shqiptare”, deklaroi Mevaip Abdiu – Drejtor Artistik “Bletëzat”.
Edhe TV21 nga burime të tij ka mësuar se vetëm 16% e buxhetit ka shkuar për projektet shqiptare. Pra vetëm 84 milionë e 300 mijë denarë, nga gjithsej 508 milionë denarë sa është buxheti.
Zëvendësministri i kulturës, Sedat Sulejmani, thotë se programi që dje e shpalosi Ministrja Irena Stefoska, është diskriminues për kulturën shqiptare.
“Vendimi i ministreshës është diskriminues dhe jashtë çdo logjike. Unë disa herë kam tentuar që të jem pjesë e procesit për programin vjetor, por ministresha ka abuzuar me atë që ia mundëson ligji dhe është thirrur se ajo vendosë për gjithçka”, potencoi Sedat Sulejmani – zëvendësministër i Kulturës.
E pyetur për përqindjen e mjeteve të ndara për projektet shqiptare, Ministrja thotë se kjo pyetje është nënçmuese.
“Kultura është diçka që i bashkon artistët dhe punëtorët e kulturës, për mua tingëllon pak, si të them, nënçmuese që ta kthejmë programin në përqindje”, u shpreh Irena Stefoska – Ministre e Kulturës.
Zëvendësministri Sulejmani gjithashtu për TV21 tha se Ministrja vetë ka vendosur edhe për komisionet që bëjnë vlerësimin e projekteve, madje edhe për anëtarët shqiptarë në to, e Stefoska nuk e mohon. Thotë se e drejtë ligjore e Ministrit është që vetë t’i zgjedh komisionet dhe grupet e punës.
“Sa i përket asaj se me kë dhe si jam konsultuar, më besoni gjatë zgjedhjes të këtyre njerëzve kompetentë, intelektualë me integritet të madh, jam konsultuar me intelektualë të lartë, artistë, njerëz të kulturës nga të gjitha fushat dhe nga të gjitha përkatësitë etnike”, shtoi ministrja e Kulturës, Irena Stefoska.
Stefoska thotë se zëvendësministri dhe sekretari shtetëror me ligj kanë kompetenca të tjera, përndryshe do të kishin kompetenca paralele. Sa i përket programit, Ministrja thotë se programi është online dhe po pret gjykimin e publikut.
“Tendenca këtë vit është heqja e “parimit”, për të gjithë nga pak sepse kjo kulturën e bën të pakuptimtë”, potencoi Irena Stefoska – Ministre e Kulturës.
Artistët ndërkaq po presin reagim nga përfaqësuesit shqiptar në Ministri. Ka kërkesa që rezultatet e konkursit të tërhiqen, por se si do të veprohet, zëvendësministri tha se ende nuk kanë sjellë vendim.