Iliq në momentin e fundit paraqitet në burg! Alispahiq: Babai i Almirit dhe Iliq nuk duhet të jenë në një burg

TË FUNDIT

Boban Iliq priti momentin e fundit për t’u paraqitur në burgun e Kumanovës, për të vuajtur dënimin me 4 vjet burg. Iliq u vetë dorëzua një orë para se t’i skadonte afati i paraqitjes, e kështu nuk pati nevojë të ndërhyjë policia.

Në po të njëjtin burg me të dënuarin për vrasjen e Almir Aliut, dënimin do ta vuajnë edhe babai i Almirit dhe familjarët e tij.

Avokati i familjes Aliu, Asmir Alispahiq shprehet i shqetësuar me vendimin që të dyja palët të qëndrojnë në të njëjtin burg dhe në të njëjtën kohë.

 “Në bazë të cilave arsye në të njëjtën kohë, udhëzohen për mbajtjen e dënimit me burg në të njëjtin burg K’shanjë, edhe i dënuari Iliq edhe të dënuarit e tjerë  në këtë lëndë, si Sedat Aliu, Abdulla Aliu dhe Sami Demiri, përderisa e dimë që objekti është me hapësira ku shanset janë të mëdha që palët të afrohen, të shihen dhe eventualisht për ndonjë ndodhi të pakëndshme që mund të ndodh në burg”, tha Asmir Alispahiq – avokat i familjes Aliu.

Në ndërkohë dje drejtor në Drejtorinë për zbatimin e sanksioneve Marjan Spasovski garantoi për sigurinë e të gjithë të të burgosurve.

 “Do ta përsëris se si Boban Iliqit, ashtu edhe të gjithë të përfshirët e tjerë në këtë rast, ne mund t’u garantojmë siguri brenda në qeli”, u shpreh Marjan Spasovski – drejtor në Drejtorinë për zbatimin e sanksioneve.

Më tej, avokati Alispahiq thotë se sipas dispozitave ligjore, i dënuari Boban Iliq duhet të dërgohet në burgun e Idrizovës ose Shtipit, burgje ku është e paraparë të qëndrojnë të dënuarit me mbi 3 vjet burg.

 “Është e pa kuptueshme se përse Gjykata Themelore e Kumanovës solli vendim që i dënuarit Iliq të dërgohet për të vuajtur dënimin në një burg ku lartësia e dënimit është deri në 3 vite. Ndërsa ashtu siç tashmë e dini dënimi me burg për të është 4 vjet. Sipas të gjitha rregulloreve dhe dispozitave ligjore, fillimisht ai duhet të drejtohet në burg ku dënimi me burg është mbi 3 vite”, shtoi avokati, Asmir Alispahiq.

Megjithatë, Boban Iliç do të mbaj burg efektiv më pak se 3 vjet sepse i është llogaritur paraburgimi dhe burgu shtëpiak. Ngjarja tragjike, ku i dënuari Boban Iliq e shtypi për vdekje Almirin ka ndodhur më 25 qershor 2016. Shkuarja e Iliqit në burg vjen pas dramës së djeshme, ku edhe pse Këshilli penal i Gjykatës Themelore të Kumanovës kishte vendosur t’ia shtyjë vuajtjen e dënimit për 3 muaj, sërish, pas ankesës së Prokurorisë së Kumanovës, vendimi ishte anuluar dhe Iliqi menjëherë u ftua të vuajë dënimin. Gjykata e Apelit ka konfirmuar dënimin me 6 muaj burg për babain e Almirit dhe nga 9 muaj për dy familjarët e tij.

TË NGJAJSHME