14 vjet burg për shoferin, 4 për pronarin dhe 6 për menaxherin – shqiptohen dënimet për aksidentin në Llaskarcë

TË FUNDIT

Gjykata Penale shpalli fajtorë pronarin, menaxherin dhe shoferin e Durmo Turs për aksidentin fatal në Llaskarcë të Sarajit ku humbën jetën gjithsej 16 udhëtarë. Durmish Beluli si pronar i kompanisë u dënua me 4 vjet burg. Përgjegjësi për transport, Remzi Miftari u dënua me 6 vjet burg, ndërsa shoferit Manoill Trifunovskit iu shqiptua dënim me 14 vjet burg. Fajtorë u shpallën edhe të punësuarit në stacionin për kontroll teknik, Igor Gjorgjievski, Goran Dukovski dhe Jane Bobarovski, të cilët morën dënim me burg nga 5 vjet.

“I akuzuari i parë Durmish Beluli për kryerjen e veprës penale vepër e rëndë kundër sigurisë së njerëzve në komunikacion nga neni 300 paragrafi 2 lidhur me nenin 297 paragrafi 2 nga kodi penal dhe dënohet me burg në kohëzgjatje prej katër viteve. I akuzuari i dytë Remzi Miftari për kryerjen e veprës penale, vepër e rëndë kundër sigurisë së njerëzve në komunikacion nga neni 300 paragrafi 2 lidhur me nenin 297 paragrafi 2 nga kodi penal, dënohet me burg në kohëzgjatje prej gjashtë viteve. Të akuzuarit e tretë Igor Gjorgjievski, Goran Dukovski dhe Jane Bobarovski për kryerjen e veprës penale vepër e rëndë kundër sigurisë së njerëzve në komunikacion nga neni 300 paragrafi 2 lidhur me nenin 291 paragrafi 1 lidhur me nenin 22 nga Kodi penal, dënohen me burg në kohëzgjatje prej pesë viteve. I akuzuari i gjashtë Manoill Trufunovski për kryerjen e veprës penale vepër e rëndë kundër sigurisë së njerëzve në komunikacion nga neni 300 paragrafi 2 lidhur me nenin 291 paragrafi 1 nga kodi penal, dënohet me burg në kohëzgjatje prej 14 viteve”, bëri të ditur gjykatësja Dijana Gruevska Ilievska.

Pronari i Durmo Turs edhe pse e ka ditur se nuk guxon, menaxhimin e transportit ia ka lënë të akuzuarit Remzi Miftari, i cili nuk ka poseduar certifikatë për kompetenca profesionale në komunikacion. Gjithashtu siç tha gjykatësja Gruevska, pronari i Durmo Turs nuk është kujdesur të kontrollojë matësin e shpejtësisë, dhe ka lejuar të bëhet manipulim me këtë pajisje, me qëllim të mos regjistrohet shpejtësia reale e autobusit.

“Edhe pse ka qenë i obliguar të kryejë kontroll për gjendjen e tahografit në autobus ka qenë i montuar pajisje për manipulim të tahografit, që të mos regjistrohet shpejtësia reale e lëvizjes së autobusit”, tha Dijana Gruevska Ilievska – gjykatëse.

Sipas konstatimit të gjykatës, autobusi në momentin e aksidentit ka lëvizur me shpejtësi prej 99 km në orë. Përskaj dënimeve me burg, gjykata u shqiptoi edhe ndalesë për kryerje të profesionit në kohëzgjatje prej pesë viteve.
Prokurori që përfaqësonte këtë lëndë, Darko Jakimovski, thotë se nuk prisnin dënim minimal për pronarin e kompanisë.

“Gjithsesi pritshmëritë tona ishin se dënimet nuk do të lëvizin afër minimumit ligjor për dënim për këtë vepër penale i cili parasheh nga katër deri në njëzet vite. Në këtë pikëpamje, patjetër që do të rishqyrtohet dënimi sepse personi përgjegjës është hallka kyçe e përgjegjësisë”, u shpreh Jakimovski.

Të pakënaqur nga dënimi mbetën edhe familjarët e viktimave.

“Duheshte të ketë dënime maksimale, të gjithë që ishin të involvuar në këtë aksident. Kjo tragjedi që ndodhi. Në historinë e Gostivarit nuk ka patur tragjedi të tillë. Si të jemi të kënaqur me dënime të tilla për të akuzuarit nga i pari te i pesti. Konsideroj se dënimet janë minimale”, thanë familjarët.

Përndryshe ngjarja tragjike pati ndodhur më datë 13 shkurt 2019 në afërsi të fshatit Llaskarcë të Sarajit. Në këtë aksident humbën jetën gjithsej 16 udhëtarë ndërsa 37 mbetën të lënduar. Gjykimi pati filluar po atë vit, gjegjësisht më 5 shtator.