Ekipet e zjarrfikësve po luftojnë zjarrin në fshatrat Malotino dhe Ramno afër Nagoriçanit të Vjetër, me përpjekje të mëdha për të ruajtur vijën e zjarrit që të mos kalojë rrugën dhe të përfshijë fshatrat fqinje. Në këtë terren operacionet nga ajri kryhen me dy helikopterë, njëri prej të cilëve është i MPB-së dhe tjetri i Serbisë, ndërsa fikja bëhet edhe nga toka.
Të tmerrshme janë pamjet nga Pehçeva, ku gjithçka është bërë shkrumb e hi, e në disa vende ende ka zjarre aktive. Nga QMK njoftojnë se 12 zjarre janë aktive ndërsa 3 janë nën kontroll. Shtabi i Menaxhimit të Krizave pranë QMK-së, ku mori pjesë Zyrtari për lidhje të Mekanizmit të Mbrojtjes Civile të BE-së, Kler Kovalecki, mbajti takim për të diskutuar gjendjen e krizës me zjarret.
Në luftimin e zjarreve ditëve të kaluara ka ndihmuar edhe një pjesë e madhe e popullsisë vendase. Por sa u përfshi pushteti lokal për të ndihmuar në përballimin e zjarreve. Sipas ministrit të Vetëqeverisjes Lokale, Zllatko Perinski, gjendja në komuna për shuarjen fillestare të zjarrit është në nivel tepër të keq, por ai u bëri thirrje kryetarëve që ta përmirësojnë situatën duke marrë pjesë në një projekt në nismën për zhvillim të komunave prej 250 milionë eurove.
Përndryshe në zjarret këto ditë u dogjën mbi 40 shtëpi ndërsa kishte evakuim urgjent të banorëve pasi flakët arritën deri te vendbanimet në pjesën lindore të vendit.