Zyberi nuk do të jetë këshilltar i Grubit

Naser Zyberi nuk do të jetë këshilltar i Artan Grubit në Ministrinë për Sistem Politik. I pyetur nga TV21, nëse Naser Zyberi do të jetë këshilltar në ministrinë që ai drejton, ai tha se Naser Zyberi nuk do të punësohet në ministrinë e re, por do të jetë pjesë e një ekipi intelektualësh që do të ndihmojnë në strukturimin e ministrisë së re.

“Z. Zyberi nuk do të punësohet në Ministrinë për Sistem Politik por do të jetë pjesë e një ekipi të intelektualëve të cilët do të bëjnë një analizë në strukturimin e kësaj ministrie. Një person i cili e njeh se si frymon Marrëveshja Paqësore e Ohrit dhe bashkë edhe me profesorët e tjerë universitarë siç është z.Borce Davitkovski dhe disa profesorë të tjerë të cilët planifikoj t’i takoj ditëve në vijim të bëjmë një ekip të profesorëve të njohësve të kësaj lëmie të cilët do të ndihmojnë në strukturimin dhe funksionalitetin e ministrisë së re që ta marrë rolin e saj të plotë“, deklaroi Grubi.

Gjatë ditës së djeshme nëpër portale u përhap lajmi se mes Grubit dhe Dragi Rashkoskit, ish-sekretarit gjeneral në Qeveri ka pasur incident fizik. Grubi mohoi një gjë të tillë ndërsa tha se një gjë e tillë është lajm i rrejshëm dhe ka për qëllim të nxisë ndarje në mes partnerëve të koalicionit.

 “Të gjithë ato lajme të rrejshme kanë qëllim të vetëm të nxisin mosbesim dhe ndarje mes partnerëve tanë të koalicionit, por nuk do të kenë sukses sepse funksionojmë shkëlqyeshëm dhe siç thashë edhe në fillim që në ditën e parë në zgjedhjen tonë që funksionojmë si një Qeveri e vetme për të gjithë qytetarët tanë”, tha Grubi.

Ndërsa si prioritet i Grubit në funksionin e tij si zv/kryeministër theksoi se do të rrisë dinamikën e Ligjit për përdorimin e Gjuhëve, ta kompletojë Agjencinë për përdorimin e gjuhëve dhe Inspektoratin për përdorimin e gjuhës shqipe, sistemimin e 1,300 administratorëve të cilët janë në punësuar në ministrinë e tij e që nuk shkojnë në punë, të trashëguar nga Sekretariati për Marrëveshjen e Ohrit.