Zonja e Parë e Ukrainës, Olena Zelenska, është duke realizuar një vizitë në Shtetet e Bashkuara për një seri të takimeve të nivelit të lartë.
Përgjatë vizitës, ajo do t’i drejtohet edhe Kongresit amerikan.
Vizita e saj vjen katër muaj pasi burri i saj, presidenti ukrainas Volodymyr Zelensky, pati bërë një fjalim virtual në Kongres, duke bërë thirrje për më shumë pajisje ushtarake.
Zelenska është takuar me Sekretarin amerikan të Shtetit, Antony Blinken, dhe pritet të takohet edhe me homologen e saj amerikane, Jill Biden të martën, ka thënë Shtëpia e Bardhë.
Ajo pritet t’i adresohet Kongresit ditën e mërkurë.
Takimi i së martës do të jetë i dyti mes zonjave të shtetit, pasi zonja Biden pati bërë një vizitë të paparalajmëruar në Ukrainë në muajin maj.