Zjarr në objekt të vjetër në Karposh, lokalizohet pas intervenimit të shpejtë

Një zjarr i madh shpërtheu te ish-objekti i firmës “Makotekst”, pranë shëtitores përgjatë lumit Vardarit, në Karposh 4 në Shkup.

Zjarrfikësit e Shkupit njoftimin për zjarrin e kanë pranuar pak para orës 12 të mesditës, pas çka menjëherë kanë reaguar me 2 makina zjarrfikëse nga njësia në Taftalixhe.

Kur zjarrfikësit panë se zjarri tashmë kishte marrë hov, menjëherë kanë kërkuar ndihmë shtesë nga njësiti tjetër në Gjorgje Petrov. Më pas ndihmë erdhi edhe nga Autokomanda dhe dy cisterna me ujë nga Higjiena komunale, pasi hidrantët përreth nuk kishin shtypje të ujit.

Një aeroplan i DMSH-së, duke u kthyer i mbushur me ujë pas realizimit të detyrës për mbështetje në shuarjen e zjarrit në Mavrovë-Rostushë, ka vërejtur tymin e dendur nga zjarri në objektin në Karposh dhe ka hedhur ujë mbi zjarrin e objektit.

Një zjarrfikësi iu ofrua ndihmë mjekësore, pasi luftoi mes tymit me flakët.

“Këtu janë disa subjekte ku janë vendosur dhe lënë disa materie plastike, kishte lloj-lloj gjërash, e çka mos?! Nuk e di pse janë përdorur gjithë ato dhe cili ka qenë funksioni objektit, por është gjetur zjarr në fazë të zhvilluar dhe vetë denoncuesi kur e lajmëroi zjarrin në qendrën tonë tha se është përpjekur ta shuajë, por i ka dalë nga kontrolli. Andaj edhe një apel që qytetarët kur të shohin zjarr, menjëherë ta paraqesin, që sa më shpejtë të mund të intervenohet dhe mos të vijë në këtë fazë që zjarri të dalë nga objekti”, u shpreh Zvonko Tomovski, Komandantit të Njësisë Zjarrfikëse Shkup.

Në total u intervenua me 8 automjete zjarrfikëse me 23 zjarrfikës. Dëme përreth nuk kishte.

Pas rreth dy orësh nga Qendra për Menaxhim me kriza u informua se zjarri u lokalizuar plotësisht, edhe pse ende kishte tym dhe një pjesë e ekipeve të zjarrfikësve ishin në terren.

Nga DMSH informuan se bëhet fjalë për një objekt të vjetër, i cili në pjesën më të madhe nuk ka funksionalitet, por në një pjesë të tij është i hapur një servis makinash, një barakë ku ka bojëra, llak dhe kimikate të tjera.