Deputetë të VMRO-DPMNE-së do të udhëtojnë drejt Brukselit për të lobuar te partitë motra që Parlamenti Europian të miratojë raportin e ri për vendin, i hartuar nga raportuesi Tomas Vajc, ku theksohet veçantia e identitetit dhe gjuhës maqedonase. Këtë e bëri të ditur kryeministri Hristijan Mickoski, i cili gjithashtu mesazh u përcolli edhe eurodeputetëve bullgarë.
“Çdokush që e mohon dhe refuzon ta pranojë këtë realitet dhe këtë fakt, është anti-NATO dhe anti-BE”, tha Mickoski
Për miratimin e raportit, Mickoski kërkoi që të angazhohet edhe opozita.
“Që sot të fillojnë të kontaktojnë partitë e tyre simotra që kanë eurodeputetë në Parlamentin Europian. E di që opozita, LSDM, është pjesë e një familjeje të tillë, i ftoj që të fillojnë që sot të lobojnë te partitë simotra”, deklaroi Mickoski.
Më herët, në një intervistë, kryetari i LSDM-së, Venko Filipçe, theksoi se partia është e gatshme të ndihmojë për çdo zgjidhje që çon në zhbllokim përmes Parlamentit Europian. Ai e tha këtë duke komentuar propozimin e presidentes Gordana Siljanovska-Davkova për një Deklaratë të veçantë.
“Ne do të angazhohemi në Parlamentin Europian, përmes grupit të socialistëve dhe demokratëve, që një dokument i tillë, qoftë Deklaratë apo si të quhet, të miratohet sa më shpejt”, u shpreh Filipçe.
Euroambasadori Mihalis Rokas nuk hyri në detaje për zgjidhjet e mundshme, por përsëriti se vizita e liderëve të BE-së, Antonio Kosta dhe Kaja Kallas, është një sinjal i fortë.
“Ata dhanë deklarata të forta, duke thënë se vendi i Maqedonisë së Veriut është në familjen e BE-së dhe ne duam të bëjmë gjithçka që është e nevojshme që ta bëjmë këtë realitet, dhe po punojmë fort për këtë”, tha Rokas.
Debati për raportin e raportuesit austriak Tomas Vajc pritet të nisë javën e ardhshme, ndërsa votimi është caktuar për më 4 korrik. Pjesa më e madhe e amendamenteve në tekstin e Vjacit janë nga eurodeputetët bullgarë. Ndërkohë, Mickoski shtoi se deri më tani nuk ka përgjigje nga pala bullgare për takimin ndërmjet presidentes Siljanovska dhe Rumen Radevit gjatë Samitit të NATO-s në Hagë.