Zgjedhjet në Bullgari, shpresë për Maqedoninë! Osmani: Nga e hëna nisim me dinamikë të re komunikimi me Sofjen

Bullgaria nesër voton për të zgjedhur përbërjen e 45 të Kuvendit Popullor. 6.895 kandidatë nga 30 parti dhe koalicione garojnë për 240 vende në Kuvendin bullgar.  Gjithsej janë mbi 6,7 milionë votues. Krahas 11,900 vendvotimeve në Bullgaria, mundësi për të votuar kanë edhe shtetasit jashtë vendit. Janë gjithsej 465 qendra votimi në botë. Në Maqedoninë e Veriut janë 5.

 “Do të votojnë në përfaqësitë e tyre diplomatike dhe konsullore dhe në 5 qendra votimi në Shkup, Shtip, Strumicë, Manastir dhe Ohër”, tha Bujar Osmani – Ministër i Punëve të Jashtme.

Ministri thotë se nuk e di saktë se sa votues ka Bullgaria në Maqedoninë e Veriut. Orientoi që të pyetet Ambasada e Bullgarisë në Shkup, po as këta nuk japin informacione. Na thanë të drejtohemi në Ministrinë e Punëve të Jashtme të Bullgarisë, por edhe nga këtu, në komunikim joformal thanë për TV21 thanë se nuk disponojnë numër të votuesve në Maqedoninë e Veriut. Tradicionalisht rreth 100 deri 120 mijë bullgarë votojnë jashtë vendit.

Përfundimin e këtyre zgjedhjeve në Bullgari, Shkupi zyrtar i sheh si shpresë për ndryshim të retorikës bullgare ndaj Maqedonisë së Veriut, të cilës ia ka bllokuar rrugën eurointegruese për shkak të kontesteve historike e gjuhësore. Kryediplomati Osmani pohon se zgjedhjet gjithnjë kidnapojnë procese politike, ngritin emocionet dhe humbin racionalitetin.

Ditë më parë, zëvendës-ndihmës sekretari shtetëror amerikan, Metju Palmer, ripërsëriti domosdoshmërinë që të mbahet konferenca ndërqeveritare mes Shkupit dhe Bashkimit Evropian për nisje të bisedimeve, duke apeluar që kontesti me Bullgarinë të zgjidhet në plan bilateral. E jo më larg se para 3 muajsh, ministrja e jashtme e Bulgarisë, Ekaterina Zaharievatha se Maqedonia nuk duhet të shpresojë aq shumë se pas zgjedhjeve në Bullgari gjërat do të ndryshojnë.

 “Është e gabuar mendimi se gjërat do të ndryshojnë pas zgjedhjeve. Nëse diçka ndryshon, kjo mund të jetë e keqe për ata. Se Bullgaria bën përpjekje që ta ndalojë të drejtën e identitetit të qytetarëve të Republikës së Maqedonisë së Veriut, kjo nuk është ashtu. Ne duam që të tejkalohen stereotipat e së kaluarës, të ndalet edukimi dhe krijimi i kombit në bazë të antibullgarizmit, të ndalet gjuha e urrejtjes”, theksoi Ekaterina Zaharieva – Ministre e Jashtme e Bullgarisë.

Se kush do ta marrë pushtetin në Bullgari, e si do të shkojë zgjidhja e kontestit, mbetet të shihet. Partia që prin në anketat në Bullgari është ajo e kryeministrit Bojko Borisov, GERB, me rreth 28% ndërsa pas saj vjen opozitarja BSP me rreth 20%. VMRO-ja e Krasimir Karakaçanovit, sipas anketave, pritet të kalojë pragun me rreth 4,4% dhe të hyjë në Kuvend. Ekspertët atje presin që nëse 45% e votuesve dalin në zgjedhje, kjo do t’i ndihmonte partisë së Borisovit dhe partnerëve të tij potencialë që të mbeten në pushtet. Por nëse dalja e kalon 51 përqindëshin, ka shanse që opozita të bëjë përpjekje të formojë qeveri. Frika nga koronavirusi mund t’i pengojë më të moshuarit të dalin në zgjedhje. Pritet që 6 deri në 8 parti të hyjnë në parlament, që do ta bënin sa të larmishëm, po aq edhe më të vështirë dhe jostabil formimin e shumicës.