Po mbushen njëzet vjet pas nënshkrimit të Marrëveshjes Kornizë, ndërsa rruga drejt Bashkimit Evropian po shkon me hapa të ngadaltë. Për këtë sot u mblodhën politikanë e përfaqësues nga sektori civil. Njëri prej tyre ishte zëvëndëskryeministri i parë Artan Grubi. Grubi në fjalimin e tij u drejtua vetëm në gjuhën maqedonase.
“Kur kujtoj atë që kemi kaluar, greva urie për të pasur të drejtën për ligjerimin në gjuhën shqipe në fakultetin pedagogjik, imagjinoni shoqëruara me parulla fashiste, e deri te konflikti. Rezistenca për Universitetin e Tetovës, gjuha, simbolet, decentralizimi, përfaqësimi i barabartë”, tha Grubi.
Por në pyetjen tonë se çfarë është implementuar deri më tani nga Marrëveshja e Ohrit u përgjigj në shqip:
“Zbatohet çdo ditë në jetën e përditshme. Do të thotë përfaqësimi adekuat nuk mund të përfundojë asnjëherë. Kemi arritur 25% dhe tash më ngrejmë dorë, sepse njerëzit pensionohen, largohen nga puna, largohen nga vendi. Është një proces i zhvillimit të përditshëm”, shtoi Grubi.
Ajo që ra në sy është vetura e Grubit e parkuar në trotuar. Por pas gjysmë ore veturën e largoi shoferi i tij.
Por, nga sektori civil theksuan se Marrëveshja e Ohrit nuk është një marrëveshje për pajtimin e maqedonasve dhe shqiptarëve, por është një marrëveshje për multikulturalizmin e gjithë shoqërisë në vend.
“Kur bëhet një marrëveshje dhe kur ka dy palë të kundërta, siç ishin para Marrëveshjes së Ohrit, të gjithë humbasin pak, por të gjithë së bashku fitojnë shumë. Sigurisht që politikanët janë fajtorë për gjithçka. Thjesht jemi këtu për të thënë se ata janë fajtorë edhe kur janë më pak fajtorë”, tha Deralla.
“Unë vij nga një komunitet më i vogël, nga ai boshnjal. Kjo bashkësi etnike është e përmendur në preambulën e vendit fal Marrëveshjes së Ohrit”, tha Hoxhiq.
ZV/kryeministri i parë Grubi theksoi se e gjithë pjesa normative e paraparë në Marrëveshjen e Ohrit tashmë është miratuar në Kuvendin e Maqedonisë së Veriut dhe po implementoht për çdo ditë.