As sot Drejtori i Entit të Statistikave Apostoll Simovski nuk ishte i gatshëm për të folur dhe sqaruar qëndrimet e kundërta mes tij dhe zëvendësdrejtorit Ilmi Selami rreth asaj nëse familjarët do të mund ose jo të deklarohen për përkatësinë etnike dhe fetare të të afërmve të tyre që ditën e regjistrimit nuk do të jenë në shtëpi, ose që kanë mbi 1 vit në mërgim. Pas refuzimit të ditës së diel, drejtori Simovski i tha sot TV21 se e ka të pamundur të flasë për shkak të agjendës së mbingarkuar.
E këto deklarata kundërthënëse të dy figurave më të rëndësishme që pritet ta çojnë përpara procesin e regjistrimit, po shkojnë në favor të opozitares VMRO-DPMNE e cila kërkon shtyrjen e procesit. Kreu i kësaj partie, Hristijan Micskoski, tha sot se as drejtori e as zëvendësdrejtori nuk janë të aftë ta kryejnë regjistrimin.
“Vetë ata, kur ende nuk ka filluar i ashtuquajturi operacion politik, e vulgarizuan në sytë e publikut dhe pastaj pyetet se pse opinioni nuk ka besim. Si do të ketë besim kur njëri me tjetrin nuk e dinë se çfarë paraqet metodologjia që vetë e paraqiten në opinion. Prandaj duhet të ikin këta njerëz”, deklaroi Hristijan Mickoski – Kryetar i VMRO-DPMNE-së.
Ditën kur e prezantoi metodologjinë e regjistrimit, drejtori i statistikave Apostoll Simovski, tha përkatësia etnike e fetare janë personale, andaj nëse vetë nuk je i pranishëm gjatë regjistrimit, këto të dhëna nuk do të mund t’i deklarojë ndonjë familjar.
“Kur ndonjë person jep të dhëna për person tjetër, në të gjitha rastet kur jep të dhëna për person tjetër, ka mundësi edhe për njerëz që mungojnë por janë në vend, nuk mundet të jepet përgjigje për ato çështje që kërkohet deklarim personal. Këto janë pyetjet për përkatësinë etnike, fetare dhe gjuhën”, theksoi Apostoll Simovski – Drejtor i Entit të Statistikave.
Po me këtë qëndrim të drejtorit, nuk pajtohet zëvendësdrejtori i statistikave, Ilmi Selami, i cili thotë se pohimet e Simovskit nuk gjenden as në ligjin për regjistrim e as në metodologji.
“Se çfarë ka dashur të thotë drejtori unë nuk e di. Më së miri ai e di dhe sigurisht se do ta pyesni edhe atë por vetëm e di një gjë se atë që e ka thënë është gabim. Gabim për dy arsye. Një gjë e tillë nuk parashihet as në ligj e as në metodologji. Dispozita ligjore është gjenerale dhe thotë do të jep të dhënat që kanë të bëjnë me personin jashtë, përfshin të gjitha të dhënat, nga numri amë dhe të gjitha të tjerat që kanë të bëjnë me regjistrimin”, u shpreh Ilmi Selami – zëvendësdrejtor i Entit të Statistikave.
Nëse procesi del të jetë ashtu siç ka thënë drejtori Simovski, opozita shqiptare ka paralajmëruar nisma për parandalim. Ndërkaq kreu i opozitares maqedonase Mickoski procesin sot e quajti marrëveshje politike që nuk ka lidhje me regjistrimin. Për të pranvera e vitit 2022 është kohë ideale për regjistrimin. Për këtë VMRO-DPMNE-ja kanë nisur iniciativë për shtyrje të procesit, nismë e cila dje është dorëzuar në Kuvend ndërsa Mickoski pret që deri në fund të muajit të nisë mbledhja e firmave, nëse eventualisht nuk del ndonjë pengesë.