Nëse Bullgaria mbetet në kërkesat e saj, duhet ta përgatisim popullin maqedonas se nuk do të fillojnë negociatat me BE-në tha kryeministri Zoran Zaev duke theksuar se bisedimet mes ministrit të Punëve të Jashtme Bujar Osmani dhe koleges së tij, Ekaterina Zaharieva nuk kaluan mirë.
“Propozimi i Bullgarisë nuk ka të bëjë as me fqinjësi të mirë, as me vëllazërim, as mund të quhet evropian. Nëse mbetet kështu, duhet ta përgatisim popullin maqedonas se nuk do të mund të fillojë konferenca e parë ndërqeveritare të cilën e presim në dhjetor. Por unë besoj se ky nuk është qëndrim i Borisovit, miku dhe vëllai im, besoj se ky nuk është qëndrimi as i popullit bullgar dhe do të bëjmë gjithçka gjatë ditëve në vijim të gjejmë zgjidhje”, deklaroi kryeministri Zoran Zaev.
Zaev porositi se vendi ynë e ka pranuar historinë e përbashkët si pjesë përbërëse e së kaluarës, por se Maqedonia e Veriut njësoj si Bullgaria, ka histori të vete e cila është e veçantë. Ai tha se ai me kolegun e tij Borisov deri më tani kanë gjetur zgjidhje për 5 personalitetet historiane dhe tre periudha historike, duke u shprehur i bindur se do të gjejnë zgjidhje edhe për këtë çështje.
“Heroi ynë i përbashkët Goce Dellçev duhet të na bashkojë, ta rrisë bashkëpunimin dhe përkrahjen. Jam i bindur se do të gjejmë zgjidhje dhe do të bëjmë gjithçka që ta vazhdojmë rrugën tonë sepse ëndrra jonë është Evropa e cila e pranon dhe e respekton të drejtën e vetëpërcaktimit. Ne jemi maqedonas që e flasin gjuhën maqedonase dhe besoj se vlerat e këtilla do të vazhdojnë edhe te fqinjët tanë”, u shpreh Zoran Zaev – Kryeministër i RMV-së.
Ai është i bindur se presidentët e të dy vendeve, Pendarovski dhe Radev do ta përkrahin këtë proces që të tregohet se këto dy vende janë të lidhura mes vete dhe kanë vlera evropiane. BE-ja në mars solli vendim për fillim të pakushtëzuar të negociatave aderuese me RMV. Bullgaria në shtator dërgoi memorandum deri te vendet anëtarë të BE-së me të cilin pohon se gjuha maqedonase nuk ekziston dhe se e njëjta është dialekt i gjuhës bullgare dhe se populli maqedonas është projekt i Tito-s. Negociatat aderuese zyrtarisht fillojnë me konferencë ndërqeveritare e cila pritet të mbahet deri në fund të vitit gjatë kryesisë së Gjermanisë. Por që të ndodhë një gjë e tillë, të gjitha vendet anëtare duhet të harmonizojnë një kornizë negociuse, proces që për momentin e bllokon Bullgaria duke kërkuar lëshime në pjesën e historisë dhe gjuhën maqedonase.