Zaev përgënjeshtron për përqindjet në kulturë!

Kryeministri Zoran Zaev përgënjeshtron se vetëm 16% e buxhetit ka shkuar për projektet shqiptare, pohim ky i sekretarit shtetëror në Ministrinë e Kulturës. I pyetur rreth kësaj, Zaev nxori celularin nga xhepi dhe filloi të lexojë se sa para kanë marrë projektet shqiptare në veprimtari të ndryshme.

“Në përgjithësi, kur ta merrni gjithë mesataren, me të gjitha paratë në programet për kulturë, në të gjitha fushat, është: maqedonasit 60,26% bartës të projekteve, shqiptarët 25,96%, të tjerët 13,78%. A s’do të na tregojë regjistrimi në fund si jemi në shtet, po adekuate është edhe qasja dhe kreativiteti ynë të propozojmë projekte”, deklaroi kryeministri Zoran Zaev.

Zëvendësministri i kulturës, Sedat Sulejmani, nuk dëshiron të flasë me përqindje, por pohon se buxheti  i ndarë për projektet shqiptare është shumë më poshtë se 25%, aq sa thotë Zaevi.

 “Tani është interpretimi i atyre. Shumë lehtë është të themi përqindje dhe ta hedhim topin tjetër kund, por ai nuk është realiteti. Do me thënë atë çka ne e kemi analizuar të gjitha projektet një nga një, cilët janë shqiptare, cilat maqedonase, cilët janë shfrytëzues të tjerë, nuk del ajo përqindje! Është shumë poshtë.

TV21: Sa del?

“Nuk dua tash të hyj në përqindje”, theksoi Sedat Sulejmani – zëvendësministër i Kulturës.

Sulejmani tregon se llogaritjet se cilat projekte kanë shkuar për kulturën shqiptare e cilat për të tjerët, e kanë bërë duke parë se kush është bartës i projektit. Njëjtë si ai, me rezultatet e konkursit nuk pajtohet as sekretari shtetëror në Ministrinë e Kulturës, Valmir Aziri. Në pamundësi ligjore për të ndërhyrë në proces, sepse vendimi është në dorë të ministres, që të dy kërkojnë rishqyrtim. Sulejmani thotë se do të përpiqet të gjejë zgjidhje me dialog brenda ministrisë, në të kundërtën zgjidhje të problemit do të kërkojnë në nivel partiak.

 “Në qoftë se nuk arrijmë ne me dialog ta zgjidhim problemin në kuadër të institucionit, atëherë kjo do të mbartet në nivel të partisë dhe do të shohim, do të ulemi ta konsultojmë këtë çështje në nivel partiak”, shtoi zëvendësministri i Kulturës, Sedat Sulejmani.

Nga kabineti i ministres së kulturës, Irena Stefoska, të pyetur për shansin e rishikimit të rezultateve, ditë më parë i thanë TV21 se sipas ligjit Ministri vendos për rezultatet. Shtojnë se në afat prej 15 ditësh nga marrja e vendimit, pjesëmarrësit e pakënaqur në Konkurs kanë të drejtë të dorëzojnë ankesë deri te Komisioni shtetëror për vendimmarrje në procedurë administrative dhe procedurë nga marrëdhënia e punës në shkallë të dytë.