Kur komuna nuk kishte çfarë të bënte për ta rrënuar ndërtimin ilegal tek “Mavrovasja”, ishte Qeveria ajo që e ndihmoi duke i gjetur zgjidhje.
“Qeveria e RSM nuk rrënoi para “Mavrovases”, Qeveria ndihmoi komunën e Çairit e cila rrënonte përballë Mavrovases, sepse dështuan procedurat për zgjedhjen e kontraktuesit, ne u ofruam kapacitetet shtetërore përmes “Makedonija pat””, deklaroi kryeministri Zoran Zaev më 07.09.2020.
Po a do të gjejë Kryeministri Zoran Zaev edhe tani një mënyrë për ta ndaluar ndërtimin e rrokaqiejve përballë Qendrës Tregtare të Qytetit?
Reagimi qytetar është i madh, ndërsa Gjykata Kushtetuese ka hedhur poshtë moratoriumin e Komunës Qendër me të cilën ishte vendosur moszbatimi i planit të vjetër urbanistik.
Përgjigje për këtë nuk morëm as nga kreu i qeverisë Zaev, e as nga zëvendësi i tij i parë Artan Grubi.
Po nëse dy njerëzit e parë të Qeverisë kanë ndonjë synim që në heshtje të kalohet kjo çështje, partnerja e qeverisëse e kryeministrit, Maja Moraçanin, thërret institucionet kompetente të ndërmarrin gjithçka për të ndaluar betonizimin e hapësirës së fundit të lirë në zemër të Shkupit.
“Për shkak se e kuptuam se investuesi tashmë i ka paguar obligimet komunale, apelojmë para së gjithash deri te Komuna Qendër që t’i kthejë ato tek investuesi”, deklaroi Moraçanin nga Ripërtëritja Demokratike e Maqedonisë.
I revoltuar nga ajo që po ndodh në qendër të kryeqytetit, ish-ministri i LSDM-së për urbanizëm dhe ndërtime, Antoni Peshev, ka nisur peticion individual online nën titullin “jo ndërtimit të objektit të madh johuman në parkingun para Holidej In-it” e që ka arritur rreth 4 mijë nënshkrime. Peshev mendon se është momenti i fundit të ndalojmë të funksionojmë me filozofinë “juridikisht mundet, juridikisht nuk mundet”.
“Ajo që ndodh kohëve të fundit është situatë në të cilën pjesërisht ishte ndaluar ndërtimi në Qendër, tani dëgjojmë se Gjykata Kushtetuese ka vlerësuar se nuk ka bazë ligjore që të ndalohet, ndërsa unë gjatë gjithë kohës pyes “po mirë a e dimë ne se çfarë ndërtojmë në qendër të qytetit dhe çfarë miraton e nuk miraton Gjykata Kushtetuese?” Pse Gjykata Kushtetuese të jetë ajo që do të vlerësojë për atë çfarë do të ndërtohet në qendër të qytetit. Të jem i sinqertë, unë nuk jam i bindur se në atë vend nuk duhet të ndërtohet. Dikush thotë se duhet të mbetet park, unë nuk mendoj se kjo është zgjidhja ideale por gjithsesi që nuk dua të lejojmë të ndërtohet pa e ditur se çfarë do të dalë në fund”, vlerëson Peshevi.
Peshev vlerëson se në këtë moment institucionet shtetërore duhet drejtpërdrejt të kyçen, megjithatë nga Qeveria deri më tani ka vetëm heshtje.
Me shfuqizimin e moratoriumit nga ana e Gjykatës Kushtetuese, investuesit “MG Feshën” dhe Kisha ortodokse përmes kompanisë “Rinovuesit” tashmë kanë paguar rreth 2,4 milionë euro obligime komunale. Kjo i çon ata një hap përpara marrjes së lejes për ndërtim nga ana e Komunës Qendër, pas çka në këto 80 mijë metra katrorë do të mund të niste ndërtimi i rrokaqiejve, të cilat askush nuk e di saktë se si do të duken.