Në një fjalim televiziv drejtuar kombit, kryeministri britanik Boris Johnson njoftoi mbrëmjen e sotme një bllokim të tretë kombëtar në të gjithë Anglinë për t’iu përgjigjur valës së re të infeksioneve me Covid por edhe mutacionit të ri të korona virusit.
Ndër masat e ndërmarra është mbyllja e menjëhershme e të gjitha shkollave. Në të gjithë Anglinë nga nesër dhe në vijim mësimi do të zhvillohet në distancë.
“Unë dua të nënvizoj se problemi nuk është që shkollat nuk janë të sigurta” por që ato “mund të veprojnë si vektorë transmetues duke shkaktuar përhapjen e virusit në familje”, tha kryeministri.
Kryeministri britanik tha se i ashtuquajturi varianti anglez i Covid-19 është “alarmues”, më ngjitës “50% deri në 70%” sesa varianti i mëparshëm dhe foli për një rritje prej 40% të pranimeve në spital krahasuar me valën e parë në prill.
Duke rekomanduar të gjithë të respektojnë rregullat dhe të qëndrojnë në shtëpi për aq kohë sa të jetë e mundur, Johnson, tha se “nëse gjërat shkojnë mirë”, në mes të shkurtit kategoritë përparësore do të jenë vaksinuar me dozën e parë .
Deri më sot, theksoi ai, “ne kemi vaksinuar” më shumë njerëz sesa në të gjithë Evropën.
Në 24 orët e fundit Britania e Madhe regjistroi 58,784 raste pozitive në 430 mijë tamponë.