Fitorja e madhe e Vetëvendosjes në Kosovë, ka ngjallur debate gjithandej, ndërsa në ClickPlus mbrëmë u fol se sa është e mundshme që një valë e tillë të rrokë edhe Maqedoninë e Veriut. Zëdhënësi i opozitares Aleanca për Shqiptarët, Flakron Bexheti, thotë se partia e tij synon të inkurajojë rininë drejt ndryshimeve të mëdha, por nga ana tjetër shton edhe se do të mirëprisnin hapjen e Vetëvendosjes si subjekt në Maqedoninë e Veriut.
Flakron Bexheti: “Ne jemi deklaruar, edhe kryetari ynë, se ne madje e mirëpresim një hap të tillë sepse e vlerësojmë se çdo shqiptar apo politikan”.
TV21: Atëherë do të ktheheni kundër vetëvendosjes?
Flakron Bexheti: “…që mund të kontribuojë…”
TV21: Se do të garoni në zgjedhje….
Flakron Bexheti: Në zhvillimin e jetës politike për një jetë më të mirë, për të ndalur migracionin, për të rritur zhvillimin ekonomik, standardin e shqiptarëve dhe gjithë qytetarëve…”.
…tash si analist je duke më folur…
Flakron Bexheti: Dhe çdokush tjetër që mund të kontribuojë që ta rrëzojmë një regjim politik të ngelur, kuptohet që ne e shohim si aleat në përcaktimin tonë për të bërë ndryshimin”.
Binas Pajaziti nga Lëvizja Besa tha se kreu i Aleancës për Shqiptarët, Ziadin Sela, pretendon të imitojë Kurtin por shtoi se nuk e ka kaluar rrugën politike, profesionale as aktivizimit të Albin Kurtit. Kërkoi të mos pritet ndihma nga jashtë, por vetë shqiptarët e Maqedonisë të mblidhen e të bashkëpunojnë për të sjellë ndryshimin.
Binas Pajaziti: “Duhet të mbledhim forcat, të mos presim shpëtimtarin nga qielli, as nga Kosova, por të mbledhim forcat gjithë partitë shqiptare këtu në Maqedoni, të punojmë si një çetë profetësh të gjithë së bashku dhe të ecim përpara, përndryshe është iluzion se shpëtimi do të vijë nga cilado anë, duhet ta bëjmë punën vetë”.
Analisti Arben Llalla tha se vota për VV, është votë mllefi ndaj politikave të vjetra në Kosovë, ndërsa sipas tij në Maqedoni, në aspektin ideologjik, nuk ka ambient për themelimin e Vetëvendosje.
Arben Llalla: “Maqedonia është një specie e veçantë dhe votuesi në Maqedoni është një specie e veçantë në krahasim me shqiptarët në Shqipëri dhe Kosovë. Do me thënë ka të bëjë kultura, pushteti, vëllimi i pushtetit, ka të bëjë afat gjatësia”.
Analisti Sefer Selimi nga ana tjetër këshilloi Aleancën për Shqiptarët të jetë e kujdesshme për pozicionimet si parti politike, sepse siç shtoi, nuk e kanë komoditetin që të marrin anë në fushatë dhe të shpallin bashkëpunime ose kundërshtime.
Sefer Selimi: “Komoditeti me të cilin ju e bëni këtë është i rrezikshëm dhe mund të vijë me pasoja në një të ardhme. Ndoshta sot ju mundoheni të merrni nga euforia e krijuar nga Vetëvendosja e të përfitoni politikisht. Pasojat? Pasoja se për shembull çfarë do të ndodhë nëse nesër Aleanca është pozitë në Qeverinë në Maqedoni dhe PDK-ja është në Kosovë. Cili do të jetë bashkëpunimi institucional i Kosovës dhe Maqedonisë?!”.
Vetë kreu i Vetëvendosjes, në qershor të vitit 2020, kishte paralajmëruar se Lëvizja Vetëvendosje do të ketë qendër edhe në Maqedoninë e Veriut. Kjo parti tashmë ka qendër edhe në Shqipëri.