Votimi në Kuvend i gjykatësve kushtetues/ VMRO-DPMNE dhe LSDM përplasen për procedurat e votimit

TË FUNDIT

VMRO-DPMNE paralajmëroi se do të dalë me denoncim për shkelje të procedurave, kurse kundër kryetares së Komisionit për Zgjedhje dhe Emërime do të ngrejë interpelancë në qoftë se votohen dy, në vend të tre gjykatësve kushtetues. Pika në rendin e ditës u referohet të gjithë gjykatësve kushtetues dhe do të jetë precedent në qoftë se lejohet votimi i tyre, duke pasur parasysh se nuk ka kaluar e gjithë procedura, thotë koordinatori i VMRO-DPMNE, Nikolla Micevski.

“Çdo ditë e sjellin Kuvendin në fazë që t’i shkelë procedurat për zbatim të Rregullores që e kemi. Më duhet të përsëris edhe një herë se kryetarja e Komisionit për Zgjedhje dhe Emërime do të ballafaqohet me interpelancë nga grupi parlamentar për shkelje të Rregullores dhe mënyrës së punës së këtij Komisioni. Absolutisht do të vijojnë denoncime dhe do të shqyrtohet e gjithë procedura për zgjedhjen e këtij grupi të gjykatësve kushtetues, sepse, e thashë edhe dje, me këtë mënyrë të zgjedhjes dhe të punës, bëjnë që Gjykata Kushtetuese të jetë antikushtetuese.”, deklaroi Nikolla Micevski, Koordinator i VMRO-DPMNE-së.

Por, koordinatori i grupit parlamentar të LSDM-së, Jovan Mitreski, thotë se në qoftë se zgjidhen dy gjykatës kushtetues, nuk do të shkelen procedurat, kurse njëkohësisht do të shmanget mundësia që shteti të hyjë në krizë kushtetuese.

“Hapet debat për secilin veç e veç dhe votohet për secilin veç e veç. Kryetarja e Komisionit informoi kryetarin e Kuvendit se për këta dy gjykatës debati ka mbaruar dhe është votuar me shumicë se duhet të vazhdojnë me procedurat e mëtutjeshme. Gjithashtu, e informoi se Komisioni do të vazhdojë me punën e vet. Nëse qëllimi i opozitës është ta bllokojë zgjedhjen e gjykatësve kushtetues dhe ta çojë vendin në një krizë kushtetuese, duke pasur parasysh se në nëntor skadon mandati edhe i gjykatësit të pestë kushtetues, ne nuk do ta lejojmë këtë.”, tha Jovan Mitreski, Koordinator i LSDM-së

Gjykata Kushtetuese tashmë një kohë më të gjatë po përballet me mungesë të gjykatësve. Deri më tani, ka punuar në prag të kuorumit dhe nga 9 gjykatës ekzistues, vendimet i sjell me vetëm 5. Nga propozimi për zgjedhjen e 3 gjykatësve kushtetues, dy prej tyre kaluan debatin në Komision, por në momentin kur duhej të vendosej për prokurorin aktual publik, Lubomir Jovevski, opozita bllokoi tërësisht punën e Komisionit.

error: Content is protected !!