VLEN e zhvendos afatin për ndryshimet e kushtetuese – Në vend të 6 muajve, në afat të pacaktuar

Koalicioni VLEN tërhiqet nga afati gjashtëmujor për vendosjen e Bullgarëve në Kushtetutë. Eurointegrimet ishin njëri prej prioriteteve kryesore dhe kushtet të VLEN gjatë përbërjes së koalicionit qeveritar me VMRO-DPMNE-në. Nga koalicioni disa herë theksuan se kanë dhënë afat prej 6 muajve, mirëpo nga ana tjetër kryeministri Hristijan Mickoski, thoshte se nuk punon me afate dhe ultimatume. VLEN tani e prolongoi afatin, por nuk dihet deri kur. Sipas tyre, fajin e ka Bullgaria.

 “Po të kishte qeveri funksionale në Bullgari, mendoj se tashmë do t’i kishim filluar negociatat për të arritur marrëveshje mes RMV-së dhe Bullgarisë. Duke pasur parasysh gjendjen në Republikën e Bullgarisë, mendoj se ka hapësirë këtu në koordinim me faktorin ndërkombëtar, që të shtyhet afati”, tha Fari Iseni, zëdhënës i koalicionit VLEN.

Tani mbetet e pasigurt nëse VLEN do të arrijë ta realizojë paralajmërimin e tyre se kjo qeveri do t’i fillojë negociatat për anëtarësim.

“Unë jam i bindur se kjo qeveri do t’i fillojë negociatat dhe nuk dua të përmbahem dhe do të jem  shumë ambicioz-se do t’i mbarojë brenda mandatit”, pati deklaruar Arben Taravari në qershor të këtij viti.

Nga opozitarja LSDM paraprakisht theksuan se janë pesimistë për eurontegrimet me pushtetin e ri. Të pyetur për afatin 6 mujor të VLEN-it, prej atje thanë se duhet të realizohen premtimet.

“Të gjitha partitë, premtimet që i kanë dhënë para votuesve, duhet t’i realizojnë. Nëse VLEN këtë ua ka premtuar votuesve që e dhanë votën e tyre dhe me ndihmën e tyre u bënë pjesë e qeverisë, atëherë pres që t’i realizojnë premtimet e tyre”, tha Daniella Nikollova, LSDM.

Kryeministri Mickoski kohë më parë tha se pret qeveri të qëndrueshme në Sofje me të cilën do të bisedojë për zbatim me prapaveprim të ndryshimeve kushtetuese. Megjithatë, partitë më të mëdha politike në Bullgari theksuan se nuk do të lëvizin as një milimetër nga ajo që tashmë është dakorduar.