Nisja e asfaltimit të kësaj rruge e cila të çon deri tek vendi ku duhet të ndërtohet shkolla, i gëzoi shumë banorët e Vizbegut. Kjo i bëri ata që të besojnë edhe më shumë se shkolla do të ndërtohet. Por doli të jetë ndryshe, pasi rruga nuk u shtrua deri tek parcela.
“Jemi demoralizuar më, prej dy vjetësh, duke na rrejt për çdo herë që vijnë.
“Këtu vetëm kur ke zgjedhje, vijnë dhe premtojnë diçka, përndryshe asgjë nuk bëhet”, tha një banor.
Banorët e kësaj lagje me vite kërkojnë ndërtimin e shkollës. Nxënësit tani mësojnë nëpër shkollat e Çairit, ndërsa udhëtojnë me vetorganizim të prindërve.
“Kanë pasur problem muajin e parë, i kanë dërguar prindërit kush ka mundur. Ne familja jonë kemi organizuar dhe unë po i dërgoj fëmijët në shkollë deri tek shkolla Adem Jashari për shkak të mungesës së transportit”, tha një banor.
Ka dy vjet që po zvarritet procedura e kësaj shkolle. E pyetem ministren e arsimit Milla Carovska, e cila me një përgjigje të shkurtër tha se, kur do të plotësohen kushtet do të ndërtohet shkolla, por pa treguar se cilat kushte duhet të plotësohen.
“Me kryetarin komunës së Butelit jemi në kontakt të vazhdueshëm. Kur do të plotësohen kushtet teknike, unë jam e sigurt se do të fillojë ndërtimi i shkollës në Vizbeg”, tha Carovska.
Edhe pse ministrja nuk dha shumë detaje, nga komuna e Butelit thonë se i kanë kryer të gjitha obligimet sa i përket dokumentacionit, dhe muajin e kaluar e kanë njoftuar Ministrinë e arsimit.