Edhe pas heshtjes pothuajse dyjavore nga ana e zëvendëskryeministrit të Bullgarisë, Krasimir Karakaçanov, ai mbetet në qëndrimet e njëjta, kurse me kryeministrin Zaev, në bisedë onlajn u morën vesh të takohen dhe të pinë nga një gotë raki.
Zaevi në një intervistë për Radio Kanal 77 deklaroi se shpreson të ketë një kthesë lidhur me kontestin mes Maqedonisë dhe Bullgarisë dhe se deri në fund të muajit nuk do të ketë veto nga ana e tyre. Por, siç tha, ai, qysh vitin e kaluar ka pasur parandjenjë se si do të zhvillohen ngjarjet.
“Se kjo punë po bëhet serioze e ndjeva një vit më parë, në tetor të vitit 2019 kur miratuan Deklaratë apo Memorandum në Parlament. Kjo ishte para një viti. Problemi i parë doli me emrin e gjatë dhe të shkurtër. Republika e Maqedonisë së Veriut apo Maqedonia e Veriut, siç është Republika e Bullgarisë apo Bullgaria. Doli se Maqedonia e Veriut ka pretendime territoriale ndaj Bullgarisë”, deklaroi Zoran Zaev – kryeministër i Maqedonisë së Veriut.
Bullgaria nuk vendosi veto, por doli me kritere sipas të cilave duhet të mbahet Konferenca e Parë Ndërqeveritare, thotë Karakaçanov.
“Tri vjet e tre muaj Marrëveshja nuk zbatohet në praktikë. As Komisioni nuk punon, e as nuk është eliminuar gjuha e urrejtjes. Mbështetja jonë nuk mund të jetë pa kusht. Kur Republika e Maqedonisë do të jetë gati për një marrëveshje konstruktive, gati do të jemi edhe ne. Për cilën fqinjësi të mirë po flasim, kur periudhën e fundit në Maqedonia kishte mbi 15.000 shkrime (artikuj) negative për Bullgarinë”, potencoi Krasimir Karakaçanov – zëvendëskryeministër i Bullgarisë.
Ndryshe, dje dështoi edhe një tentativë që historianët maqedonas dhe bullgarë t’i afrojnë qëndrimet dhe të arrijnë marrëveshje për çështjet kryesore të cilat kontestohet me muaj të tërë. Anëtarët e Komisionit u përplasën rreth mbiemrit “maqedonas”, por edhe rreth Mbretit Samoil, pas çka mosmarrëveshjet përshkallëzuan aq shumë saqë historianët refuzuan t’i nënshkruajnë procesverbalet e mbledhjeve. Pas takimit të fundit të komisionit, duket se të dyja palët ende janë larg arritjes së një zgjidhjeje të pranueshme.