Vdekja e Teodora Ristovskës në aksident trafiku, Gjykata Themelore në Tetovë: Gjykatësit kanë vepruar sipas ligjit, i akuzuari është dënuar me dënimin maksimal që e lejon ligji

Nga Gjykata Themelore në Tetovë kanë reaguar në lidhje me kritikat në opinion pas vendimit për dënimin ndaj Mensur Pajazitit, i cili më 7 prill u shpall fajtor për veprën penale “Vepra të rënda kundër sigurisë së njerëzve dhe pronës në komunikacion”, dhe u dënua me 2 vjet burg, pasi më datë 15.08.2022 shkaktoi aksident në trafik ku vdiq 22-vjeçarja Teodora Ristovska, përcjell TV21. Nga Gjykata thonë se “gjykatësit kanë vepruar sipas ligjit”, dhe apelojnë deri tek opinioni që, siç thonë ata, të përmbahen nga komentet e paarsyeshme.

Në lidhje me: Pajaziti u dënua me dy vjet burg për vdekjen e Teodora Ristovskës në aksident trafiku! Familjarët të revoltuar: “Sa kushton jeta në Maqedoni?”

“Gjatë caktimit të dënimit për të akuzuarin, gjyqtari ka marrë parasysh si rrethanat rënduese ashtu edhe ato lehtësuese, përkatësisht: mënyrën e kryerjes së veprës penale, përgjegjësinë penale të të akuzuarit, sjelljen e tij në sallën e gjyqit, rrethanat që kanë të bëjnë me llojin, karakterin, peshën dhe seriozitetin e veprës penale, kushtet e rrugës, rrethanën që e ndjera në rrugë ka qenë duke kaluar vend të caktuar për këmbësor, pasojat e dëmshme të shkaktuara si pasojë e veprimit të inkriminuar, rrethanë që
përfaqësuesit ligjorë të të ndjerës iu bashkuan ndjekjes penale dhe ngritën kërkesë pasurore, rrethanën që i pandehuri ka pranuar fajin, ka shprehur keqardhjen për ngjarjen, se i akuzuari nuk ka qenë më parë
i dënuar dhe se ndaj tij nuk zhvillohet asnjë procedim për vepër tjetër penale. Duke vlerësuar të gjitha rrethanat, gjyqtari në procedurë të përsëritur e ka dënuar të akuzuarin me dënimin maksimal të lejuar, duke marrë parasysh ndalimin e ndërrimit për dënim më të keq (Reformatio in peius) si
parimi i parashikuar në Ligjin për Procedurë Penale, në një situatë kur, me kërkesë të të akuzuarit, Gjykata Supreme ka rrëzuar vendimet dhe rasti i është kthyer gjykatës së shkallës së parë për rivendosje dhe për shkak të këtij ndalimi, aktgjykimi i ri nuk mund të ndryshohet në dëm të të akuzuarit, as në aspektin e kualifikimit ligjor të veprës dhe as në lidhje me sanksionin penal”, thuhet mes tjerash në reagimin e Gjykatës Themelore në Tetovë.

Nga Gjykata Themelore në Tetovë thonë se rasti pasi është kthyer në rigjykim, i është caktuar një gjyqtari tjetër sepse, gjyqtari që fillimisht e kishte dënuar të akuzuarin me 3 vjet e 6 muaj burg, ishte pensionuar.

Kujtojmë se në vendimin e 7 prillit, gjykatësi Elvedin Ferati tha se “Pajaziti ishte fajtor sepse me 15.08.2022 në Tetovë si pjesëmarrës në komunikacion nuk i ka respektuar rregullat dhe me këtë ka rrezikuar komunikacionin publik”.

Sipas gjykatësit, ai ka qenë duke vozitur automobilin “BMW” dhe ka lëvizur përgjatë bulevardit me shpejtësi 59 kilometra në orë, e cila shpejtësi nuk i është përshtatur kushteve të rrugës për të mundësuar ndalimin e automobilit në kohë, ku edhe nuk i ka dhënë përparësi këmbësores Teodora Ristovska, tashmë e ndjera, e cila ka qenë duke kaluar në vendkalimin e shënuar për këmbësorë./tv21.tv