Vazhdon rrënimi i objekteve të paligjshme në Ohër! Koncesionerët reagojnë: Po mendojmë ku ta gjejmë shpëtimin

TË FUNDIT

Objektet që janë në ujërat e Liqenit të Ohrit dhe janë ndër plazhet më të njohura, po shkojnë në histori. Komuna e Ohrit me mekanizim të rëndë po vazhdon rrënimin. Qiramarrësit shprehen të revoltuar, duke thënë se qindra familje do të mbesin pa punë.

 “Ne gjetëm mënyrë sipas koncesionit të vjetër të paguajmë qira. Qiranë e kemi paguar, koncesioni është paguar deri më 28.02.2021. Domethënë nuk bëhet fjalë për imazh të gabuar se po bëjmë krim”, u shpreh Marjan Mallovçev – menaxher i një plazhi.

Nga pushteti lokal pohojnë se nuk do të kenë tolerancë për punën ilegale dhe realizim të interesave biznesi të disa firmave të cilat pa marrëveshje për koncesion dhe jashtë procedurave ligjore kanë ndërtuar objekte dhe kanë uzurpuar tokë shtetërore, me çka kanë shkaktuar dëm në zonën e mbrojtur. Nga ana tjetër, përfaqësuesi i shfrytëzuesve të plazheve thotë se aktivitetet e ndërmarra nuk janë në pajtueshmëri me ligjin.

 “Po injorohet fakti se procedura për ankand publik me të cilën do të zgjidhej statusi i plazheve në Ohër që jepen me qira, ose gjerësisht thënë koncesion, nuk ka mbaruar. Konsiderojmë se bëhet fjalë për tejkalim serioz të autorizimeve nga ana e komunës që çështjen në fjalë ta zgjidhë jashtë rregullave ligjore”, tha Mihail Kiçeec – përfaqësues i shfrytëzuesve të plazheve. 

Aksioni i sotëm u zhvillua me prani të shtuar të policisë. Plazhet tashmë disa ditë nuk punojnë pasi janë shkyçur nga energjia elektrike, kurse siç paralajmëruan nga Komuna e Ohrit, pas përfundimit të punimeve në këtë pjesë të bregut, do të fillojë edhe heqja e platformave dhe objekteve te lagjja Kaneo. Kjo është vetëm një nga gjërat që duhet të bëhen në Ohër, që qyteti ta ruajë statusin e trashëgimisë natyrore dhe kulturore të UNESKO-s.