Vazhdojnë përgënjeshtrimet ndaj Mickoskit, diaspora regjistrohet dhe do të jetë pjesë e përqindjes totale

Pushteti dhe opozita shqiptare vazhdojnë të përgënjeshtrojnë kreun e VMRO-DPMNE-së Hristijan Mickoski që thotë se diaspora vetëm do të evidentohet e nuk do të hyjë tek numri i përgjithshëm i të regjistruarve. Ata që mendojnë kështu, koordinatorit të grupit parlamentar të BDI-së Arbër Ademi i krijojnë përshtypjen se fare nuk e kanë lexuar ligjin dhe metodologjinë, të cilat siç shton, janë në përputhje me standardet e OKB-së dhe Eurostat-it.

“Opinioni dhe çdokush tjetër nuk duhet të bie pre e dezinformatave të tilla, e të pavërtetave se diaspora nuk regjistrohet. Përkundrazi, regjistrimi i diasporës po vazhdon edhe sot e kësaj dite. (ngjitje 13,10) Nuk ka kurrfarë dilemash dhe nuk duhet, të paktën sipas gjykimit tim, t’u japim rëndësi deklaratave të cilat aspak nuk janë të bazuara në ligj, aspak nuk janë të bazuara në metodologji por janë të bazuara në motivacionin e politikës ditore dhe shkaktimit të hutisë në opinion”, deklaroi Ademi.

Edhe deputeti i opozitës shqiptare, Elmi Aziri, thotë se në ligj është qartë e precizuar se diaspora regjistrohet. Si koalicion janë të bindur se arsyeja e shtyrjes së regjistrimit nuk është pandemia.

“Fatkeqësisht po dalin në sipërfaqe të gjitha dilemat tona se edhe deklarata pas atij takimi, edhe të Mickoskit edhe të Zaevit, janë në funksion të intervenimeve të mundshme edhe në metodologji por edhe në ligj. Fatkeqësisht është se pjesë e kësaj tendence po bëhet edhe Ali Ahmeti me BDI-në. Për ne si koalicion opozitar është i papranueshëm çdo intervenim qoftë në metodologji, qoftë në ligj”, tha Aziri.

Tashmë disa ditë me radhë, pasi u takua kokë më kokë me kryeministrin Zoran Zaev, lideri i opozitares VMRO-DPMNE, Hristijan Mickoski, ripërsëritë qëndrimin se diaspora vetëm duhet të evidentohet, e jo të hyjë në përqindjen e përgjithshme të të regjistruarve.

“Të gjithë që kanë më shumë se 12 muaj e kanë çlajmëruar banimin në Maqedoni, nuk munden që bashkë me mua të hyjnë në numrin total të popullsisë rezidente. Unë dhe VMRO-DPMNE ato numra nuk do t’i njohim dhe nuk ekziston forcë që do të më bëjë mua të shkoj kundër standardeve të Eurostat-it”, deklaroi Mickoski.

Kundër qëndrimit të Mickoskit ka dalë edhe kryeministri Zaev, i cili ditë më pare tha se edhe diaspora është pjesë e këtij populli, andaj duhet të regjistrohet. Edhe drejtori i entit për Statistikë, Apostoll Simovski, ka sqaruar se ligji për regjistrim njeh regjistrim dhe vetëregjistrim, të rezidentëve dhe jorezidentëve që kanë shtetësi të Maqedonisë së Veriut, e të cilët në fund do të përbëjnë numrin total të të regjistruarve.