Banorët e Urviçit kanë kushtëzuar instalimin e ujësjellësit në Siniçan. Edhe pse të gjithë palët pas takimit deklaruan se ka përparim në bisedime, banorët e Urviçit kanë kushtëzuar fillimin e punimeve të ujësjellësit me realizimin e pesë projekteve në fshatin e tyre.
Për kryetarin e Bogovinës, Albon Xhemaili kërkesat janë të realizueshme por Qeveria duhet të ndihmojë me mjete shtesë.
“Takimi ishte konstruktiv. Por edhe banorët e Urviçit dolën me ca kërkesa. Faktikisht, kanë 5 kërkesa dhe unë mendoj se këto kërkesa janë të realizueshme dhe duhet t’u ndihmohet. Kërkojnë ndërrimin e tubacionit të vjetërsuar të cilët kërkojnë nëpërmjet Qeverisë mjete për t’u realizuar kërkesat e tyre. Kanë edhe katër kërkesa por unë nuk dua t’i zbulojë për shkak të procesit që mos të ketë situata të ndryshme dhe keqkuptime” tha kreu i Bogovinës, Albon Xhemaili.
Banorët e Urviçit sipas Xhemailit janë kundër rinisjes së punimeve në Siniçan deri sa nuk marrin një premtim për kërkesat e tyre. Për kushtëzimin e ujësjellësit përfaqësuesi i bashkësisë lokale të Urviçit nuk foli para mediave. Njoftoi vetëm se ka përparim në bisedime.
“Kemi arritur mirëkuptim dhe negociatat do të rrjedhin më tej. E rëndësishme është se bisedimet në Siniçan janë të suksesshme në bisedimet në Siniçan. Cili është mirëkuptimi? Mirëkuptimi është se ata që duan ta marrin ujin atje, në vendin e caktuar ajo nuk kontestohet nga ana e fshatit të Urviçit. Do të thotë mund të vazhdojnë punimet? Po, po do të mund të vazhdojnë dhe nuk është kontestuese. Ne, si Bashkësi Lokale Urviç jemi të vetëdijshëm se duhet gjithkush duhet të pijë ujë dhe mendoj se nuk ka nevojë për diçka tjetër më”, deklaroi Hajredin Gafuri nga Bashkësia Lokale e fshatit Urviç.
Përfaqësuesit e bashkësisë lokale në Siniçan nuk janë kundër kërkesave të Urviçit, por shtojnë se derisa nuk ka zgjidhje nuk do t’i ndërpresin protestat.
“Derisa nuk tërhiqet policia, ne do të jemi vazhdimisht atje. Vazhdimisht dhe nuk do të tërhiqemi” thanë nga Bashkësia Lokale e Siniçanit.
Përndryshe, banorët kanë vazhduar edhe sot të qëndrojnë në bjeshkë për të shprehur revoltën për ndërprerjen e punimeve të ujësjellësit të fshatit Siniçan. Protesta erdhi pasi forcat policore kanë ndërprerë punimet e ujësjellësit të Siniçanit dhe po kryejnë roje në bjeshkë duke siguruara se punimet nuk do të rifillojnë. Në Qeveri takimi i dytë do të realizohet të martën dhe mbetet të shihet se nëse kërkesat e Urviçit do të pranohen dhe a do të rifillojnë punimet e ujësjellësit./TV21