Unioni i Nxënësve të Shkollave të Mesme do të vazhdoj të bojkotoj mësimin përsëri prej ditës së hënë, është vendimi i Unionit. Megjithatë UNSHM sot zhvilloi takim me grupin parlamentar të VMRO-DPMNE-së për të diskutuar mbi kërkesat e maturantëve. Blendi Hodai nga Unioni thotë se kërkesat janë të mbështetura nga shumica e nxënësve të shkollave të mesme dhe se janë kërkesa legjitime.
“Kërkojmë mbështetje nga ana e tyre si të përzgjedhurit e popullit që publikisht t’i mbështesin kërkesat tona dhe ne të njëjtën kohë të organizojnë debat publik në Kuvend që kërkesat tona të dëgjohen nga të gjithë, për shkak të mohimit nga ana e ministres së Arsimit që është duke e bërë çdo ditë e më shumë”, tha Blendi Hodai – kryetar i UNSHM-së.
Kërkesa e tyre është provimi i maturës shtetërore të ketë vetëm dy lëndë. Lënda e parë të jetë gjuhë amtare, lënda e dytë të jetë zgjedhore, si dhe detyra projektuese. Igor Zdravkovski, deputet i DPMNE-së anëtar në Komisionin për Arsim dhe Shkencë tha se maturantët do të kenë mbështetjen e plotë të tyre.
“Absolutisht kanë të drejtë t’i kërkojnë të drejtat e tyre për shkak të gjitha rrethanave me Covid-19, për shkak të mënyrës së si zhvillohet mësimi dhe vlerësojmë se nuk shkelet as Kushtetuta e asnjë nga ligjet për Arsim të mesëm dhe për këtë kanë mbështetje të plotë. Do t’i shfrytëzojmë të gjitha mënyrat që janë në dispozicion që ta aktualizojmë këtë temë dhe të ju ndihmojmë nxënësve të shkollave të mesme”, theksoi Igor Zdravkovski – deputet i VMRO-DPMNE-së.
Të enjten Unioni i Nxënësve të Shkollave të Mesme ka dërguar një letër për mbështetje drejt të gjithë deputetëve në Kuvend, nga ku Hodai tha se mbështetje u ka ardhur edhe nga koalicioni ASH dhe AAA. Ata presin të njëjtën gjë edhe nga deputetët e pushtetit.
“Janë kërkesa që nuk i takojnë asnjërës palë, por janë kërkesa legjitime të nxënësve dhe në asnjë mënyrë këto kërkesa nuk janë të politizuara e as të partizuara”, potencoi Blendi Hodai – kryetar i UNSHM-së.
Ndërkohë që vetëm dje 68 % e maturantëve kanë bojkotuar mësimin, shtoi Hodai.