Mbrëmë në suaza të projektit “Themele të përbashkëta” u mbajt edhe ngjarja e dytë në temën “Film dhe teatër”. Ngjarja për promovimin e veprimtarëve të shquar të filmit dhe teatrit shqiptar në Maqedoninë e Veriut nga pavarësia e deri më tani, ka për qëllim që të prezantojë sfidat dhe sukseset me të cilat janë përballur në të kaluarën, si dhe si kanë ndikuar në zhvillimin e popullit shqiptar në vend.
Në këtë ngjarje u promovua dhe u transmetua film i shkurt dokumentar në të cilin folën shumë punëtorë të shquar të filmit dhe teatrit. I njëjti film do të transmetohet këtë javë edhe në TV21. Pas përfundimit të promovimit zyrtar, mysafirët i argëtoi këngëtari dhe tenori i njohur shqiptar Mustafa Imeri.
Ndër vite në RMV kultura dhe tradita shqiptare përmes kinemasë dhe teatrit kanë kontribuuar në zhvillimin dhe njohjen e karakterit tonë multietnik, duke treguar pasqyrën e popullit shqiptar përmes filmave dhe shfaqjeve, jo vetëm te ne, por edhe nëpër botë. Veprimtarët e shquar nga këto profesione me shumë mund dhe guxim në çdo fjalë, në çdo ngjarje, në çdo tregim të thurur kanë kontribuuar për përparim më të madh në zhvillimin e kulturës.
Në suaza të projektit “Themele të përbashkëta” me rastin e 30 vjetorit të pavarësisë së RMV-së do të mbahen gjashtë ngjarje në gjashtë tema të ndryshme, siç janë letërsi, art, gjuhë, sport, film dhe teatër dhe bashkëjetesë në RMV, ndërsa financohet nga Sekretariati i Përgjithshëm i Qeverisë së RMV përmes mbështetjes financiare të agjencive për organizimin e ngjarjeve.