Kujtim Fejzuli është njëri nga sulmuesit e Vjenës. Ai është nga fshati Çellopek i Tetovës, ndërsa bashkë me familjen jeton në Vjenë të Austrisë. Ekipi i TV21 gjatë ditës së sotme ka qëndruar në këtë fshat të Tetovës.
Gjendemi në fshatin Çellopek pikërisht para shtëpisë së Kujtim Fejzulit, tek njëri prej sulmuesve. U munduam të kontaktojmë me familjarë të familjes Fejzuli, por asnjëri nuk do që të dal para kamerave. Ata thonë se ai kohëve të fundit ka shfaqur shenja agresiviteti dhe ka qenë i veçuar nga familjarët tjerë , ai ka vizituar shpesh familjarët e tij në Maqedoni si verës po ashtu edhe gjatë dimrit.
Në fshat nuk do askush të flas për këtë rast. Ata thonë se janë të befasuar se pikërisht njëri nga sulmuesit është bashkëfshatari i tyre. Shkuam edhe në shtëpinë e gjyshit të tij, ai thotë se para dy muajve ka qenë tek vajza në Austri edhe Kujtimi ka jetuar në një banesë të ndarë nga familjarët e tjerë. Sipas gjyshit Kujtimi ka vizituar vazhdimisht vendlindjen. Kujtimi ka qenë në burg thotë gjyshi i tij duke mos dashur të flas më shumë.
U munduam të kontaktojmë edhe me babanë e Kujtimit, po telefoni i tij ishte i fikur.
Ministri austriak i Punëve të Brendshme Karl Nehamer tregoi emrin e terroristit të vrarë – Kujtim Fejulli, i cili më 25 prill të vitit të kaluar u dënua me 22 muaj burg për përpjekjen për të udhëtuar në Siri për t’u bashkuar me Shtetin Islamik.
Fejzulli u la i lirë me kusht më 5 dhjetor të vitit të kaluar sepse, bazuar në moshën e tij, është përfshirë me legjislacion më të lehtë për kundërvajtësit më të rinj.
Në mesin e të vdekurve në sulmin terrorist në Vjenë, është edhe Nexhip Vrenezi, 20-vjeçar nga Veleshta e Strugës së Maqedonisë së Veriut.
Dyshohet se 20 vjeçari ka ndërruar jetë pasi është qëlluar nga ana e terroristëve në momentin kur ka dalë nga një lokal për të pirë një cigare.