Autostradat dhe rrjeti hekurudhor i Bashkimit Evropian nuk janë të përgatitura për zhvendosje të shpejta dhe efikase të ushtrisë dhe pajisjeve ushtarake në rast të një konflikti të mundshëm me Rusinë, paralajmëroi komisionari evropian për Transport dhe Turizëm, Apostolos Tzitzikostas, në një intervistë për “Financial Times”.
Sipas tij, Bashkimi Evropian planifikon të investojë së paku 17 miliardë euro për modernizimin dhe përshtatjen e infrastrukturës, me qëllim rritjen e mobilitetit ushtarak. Ai theksoi se tanket e NATO-s, të cilat mund të peshojnë deri në 70 tonë, aktualisht nuk mund të kalojnë nëpër disa tunele, ndërsa në disa ura mund të shkaktojnë shembje.
“Kemi ura të vjetruara që duhet të rinovohen, ura të ngushta që duhet të zgjerohen, si dhe vende ku nuk ekzistojnë fare ura – ndaj ato duhet të ndërtohen nga fillimi,” deklaroi Tzitzikostas.
Ai shtoi se aktualisht zhvendosja e njësive ushtarake nga Perëndimi drejt Lindjes së Evropës është e ngadaltë dhe joefikase, në disa raste mund të zgjasë me javë, madje edhe me muaj. Kjo, sipas tij, përbën një ndjeshmëri serioze në rast të një krize në kufijtë lindorë të BE-së.
Për këtë arsye, në Bruksel po punohet për një strategji të re që do të mundësonte zhvendosjen e trupave brenda disa orëve ose ditëve. Parashikohet modernizimi i rreth 500 projekteve infrastrukturore, përfshirë rrugë, ura dhe linja hekurudhore, përgjatë katër korridoreve kryesore ushtarake të BE-së. Emrat dhe lokacionet e këtyre projekteve, të dakorduara në bashkëpunim me NATO-n, mbahen të fshehta për arsye sigurie.
Për kujtesë, në qershor, Sekretari i Përgjithshëm i NATO-s, Mark Rutte, e cilësoi Rusinë si “kërcënimin kryesor për Aleancën”, duke paralajmëruar se Moska mund të ndërmarrë një sulm deri në vitin 2030.
Nga ana tjetër, presidenti rus Vladimir Putin, në një intervistë me gazetarin amerikan Tucker Carlson, deklaroi se Rusia nuk ka për qëllim të sulmojë vendet e NATO-s, duke i quajtur këto akuza pjesë të propagandës amerikane.