Presidenti amerikan, Donald Trump deklaroi se nuk është i shqetësuar për humbjen zgjedhore të aleatit të tij afatgjatë Viktor Orban në Hungari dhe shprehu një mendim pozitiv për kryeministrin e sapozgjedhur Peter Magyar.
Në një intervistë për “ABC News”, Trump theksoi se beson se Magyar do ta kryejë me sukses detyrën e tij.
“Mendoj se njeriu i ri do të bëjë një punë të mirë, ai është një njeri i mirë”, tha Trump. Ai shtoi se nuk është i sigurt nëse prania e tij personale në fushatë do ta kishte ndryshuar situatën, duke pasur parasysh se në vend të tij në Hungari ishte dërguar zëvendëspresidenti J.D. Vance.
Sipas Trump, Orban në një moment kishte qenë tashmë “dukshëm prapa” kundërshtarit të tij. Edhe pse presidenti i SHBA-së javën e kaluar pati një fjalim të shkurtër në një tubim elektoral në Hungari përmes lidhjes telefonike, ai theksoi se nuk ishte plotësisht i përfshirë në këtë cikël zgjedhor, ndonëse ende e konsideron Orbanin “një njeri të mirë”.
Viktor Orban humbi pushtetin pas 16 vitesh qeverisjeje, pasi votuesit hungarezë në numër rekord mbështetën opsionin pro-evropian të Peter Magyar, liderit të qendrës së djathtë.