Presidenti i SHBA-së, Donald Trump, konfirmoi të premten se u kishte blerë disa anëtarëve të kabinetit të tij të njëjtat këpucë nga marka e tij e preferuar.
Dhurata e pazakontë u raportua fillimisht këtë javë nga The Wall Street Journal, ku shkruhej se Trump kishte shpërndarë palë këpucësh të markës Florsheim me vlerë rreth 145 dollarë, madje ndonjëherë edhe duke ua gabuar numrin e këpucëve personave.
“Është një këpucë e mirë”, tha Trump në një intervistë për Fox Radio kur u pyet për këtë histori.
“Kjo është ajo që bëj, për dikë që për shumë e shumë vite ka ecur me këpucë që nuk ishin të mira dhe nuk ishin shumë të rehatshme”, tha republikani 79-vjeçar.
“Kështu që unë argëtohem me këtë. Kur më thonë se kanë problem, u them: ‘Më lër të të marr një palë këpucë.’ Duket se funksionon mjaft mirë. Tani ata duken shumë elegantë dhe bukur. Është një dhuratë nga Donald Trump.”
Trump shtoi gjithashtu se “kurrë nuk i ka pëlqyer që anëtarët e kabinetit të hyjnë me atlete”.
Sipas raportimit të The Wall Street Journal, ndër ata që kanë marrë këto këpucë janë nënpresidenti JD Vance, sekretari i Shtetit Marco Rubio dhe sekretari i Mbrojtjes Pete Hegseth.
Në një fotografi shihej Rubio me një palë këpucë që dukeshin si të njëjtat, të cilat në pjesën e thembrës dukeshin paksa të mëdha.
Modeli në faqen e internetit të Florsheim që i ngjan më shumë atyre në fotografi është një këpucë klasike prej lëkure e prodhuar në Kinë, e cila shitet për rreth 145 dollarë për palë.