Trajanovski u ankua për NP “Rrugët Shtetërore”! “Ndërmarrjen e mora me borxhe dhe kontrata me shuma të larta”

Drejtori i Ndërmarrjes Publike për Rrugët Shtetërore, Koce Trajanovski, u ankua se e ka gjetur drejtorinë me një gjendje shumë të keqe financiare dhe fatura të papaguara, kontrata me çmime shumë të larta, si dhe borxhe. Ai tha se deri tani kanë arritur të rregullojnë diçka dhe të rrisin mbledhjen e tarifave të rrugës, por nuk përmendi asgjë lidhur me zbatimin e projekteve të rëndësishme për korridoret 8 dhe 10 D, si dhe autostradën Kërçovë – Ohër.

“Në mbledhjen e mjeteve nga pikat pagesore të rrugës, nëse krahasojmë korrikun e vitit 2023 me korrikun e vitit 2024, kemi një rritje me 66 milionë në korrik të vitit 2024 në krahasim me vitin e kaluar. Dhe dua të theksoj diçka tjetër, janë nënshkruar kontrata me çmime shumë të larta. Vetëm një shembull do të jap për krahasim. Për angazhimin e një inxhinieri të specializuar elektrik me arsim të lartë, për një orë pune është 30 mijë denarë, pothuajse 500 euro për një orë pune”, tha Koce Trajanovski – Drejtor i NP “Rrugët Shtetërore”.

Ministri i Transportit, Aleksandar Nikollovski, tha se me Trajanovskin po diskutohet për projektet e Korridoreve 8 dhe 10 D dhe autostradës Ohër-Kërçovë.

“Kemi takime javore për dy projektet më të mëdha, njëri është përfundimi i autostradës nga Ohri deri në Kërçovë dhe tjetri është fillimi dhe përshpejtimi i punimeve në zgjidhjet e autostradave që janë pjesë e korridorit 8 dhe korridorit 10, kryesisht këtu është Prilep – Manastir, Tetovë – Gostivar dhe Gostivar – Bukojçani, dhe në periudhën e ardhshme sigurisht do të vijojnë edhe projektet e tjera që po realizon Ndërmarrja Publike për Rrugët Shtetërore”, u shpreh Aleksandar Nikollovski – Ministër i Transportit dhe Lidhjeve.

VMRO-DPMNE para zgjedhjeve kritikoi se asgjë nuk po bëhet për Korridoret 8 dhe 10 D, por megjithatë, edhe tani nuk ka një njoftim se së shpejti mund të fillojnë punimet, pasi ende po punohet për eksproprijimin e nevojshëm dhe zhvendosjen e linjave elektrike. Së fundmi, Trajanovski tha se pret që Bechtel dhe Enka të hyjnë në terren dhe të fillojnë punën kah Viti i Ri.