Thirrja e kandidates për presidente, Gordana Siljanovska-Davkova që VMRO-DPMNE të fitojë 61 deputetë në zgjedhjet parlamentare, për kandidatin e Frontit Europian për president, Bujar Osmanin, është thirrje për të përjashtuar komunitetet tjera nga vendimmarjet më të rëndësishme në Maqedoni. Ai i rikujton Davkovës nenin 137 nga Kodi Penal, i cili parasheh dënim me burg për ata që në bazë të gjinisë, racës, ngjyrës, prejardhjes kombëtare dhe sociale, gjuhës apo rrethanave tjera, pamundësojnë apo kufizojnë të drejtat e njeriut të vërtetuara me Kushtetutë. Sipas Osmanit, kjo thirrje e Davkovës do të thotë përjashtim i shqiptarëve, turqve, boshnjakëve, romëve e të tjerëve në vendimmarrje të rëndësishme. Nuk vonoi përgjigja e Davkovës. Ajo përmes një statusi në platformën X, thotë se 61 deputetë nuk i përjashton shqiptarët, por i përjashton kriminelët e BDI-së.
“Zotëri Bujar Osmani, 61 deputetë nuk i përjashton komunitetet, sepse të gjitha ligjet sistematike sillen me badenter, por i përjashton kriminelët e BDI-së të cilët janë të gatshëm të shesin gjithçka, që të ruajnë kolltukun dhe të vazhdojnë të shantazhojnë, duke menduar se do të shpëtojnë nga përgjegjësia për krimet dhe dëmin që ia sollën shtetit”, tha Gordana Siljanovska-Davkova, VMRO-DPMNE.
Por ky status i Davkovës, nuk ia ndryshon mendjen Osmanit. Ai fton Siljanovskën në duel, që bashkarisht t’i paraqesin ofertat e tyre para qytetarëve, dhe siç thotë, qytetarët të vendosin mes integrimit europian dhe izolimit, pasaportave europiane apo atyre bullgare.
“Dhe meqenëse në këto zgjedhje nuk kemi garë mes partive politike por kemi betejë mes dy ofertave dhe vizioneve alternative, mes integrimit europian dhe izolimit. Mes bashkëjetesës dhe supremacisë nën slloganin “61”, mes pasaportave europiane karshi pasaportave bullgare. Pasi janë dy koncepte që u ofrohen qytetarëve e ftoj zonjën Davkova në debat me mua, ose le të vjen në podcastin tim dhe t’i argumentojmë qëndrimet tona mbi këto dy koncepte alternative që qytetarët të shohin qartë se para çfarë zgjedhjesh janë vendosur”, tha Bujar Osmani, BDI.
Përndryshe, thirrje për të fituar 61 deputetë në zgjedhjet parlamentare, më parë ka bërë edhe kryetari i VMRO-DPMNE-së, Hristijan Mickoski. Në konventën e kësaj partie ku u konfirmua kandidati për president, Mickoski tha që fitorja duhet të jetë e qartë me 61 deputetë, dhe ky do të jetë misioni i tyre i përbashkët. Një prej arsyeve pse e kërkon këtë, është që të menaxhojnë me institucionet pa diktime dhe pa shantazhe.