Themelimi i Akademisë Shqiptare / Kasami: Reagimet nuk janë sikur ato për UT-në

Krerët e katër komunave që udhëhiqen nga VLEN zhvilluan takim me Shoqatën e akademikëve shqiptarë. Sipas kryetarit të komunës së Tetovës Bilall Kasami, komunat që udhëhiqen nga kryetar shqiptarë që janë pjesë edhe të Vlenit do të financojnë këtë shoqatë me qëllim që Akademia të bëhet realitet. Për kundërshtimin e VMRO-së, Kasami tha se reagimi i Mickoskit për këtë akademi nuk ka qenë i ashpër sikurse ka qenë dikur reagimi i partive maqedonase për hapjen e UT-së.

“Unë do falënderoj  partnerin e koalicionit  që ka dhënë mendimin e tij, por reagimi ka qenë shumë më ndryshe kur u nis universiteti  Tetovës. Në këtë rast është e drejta e çdo kujt të ketë mendimin e tij  për çdo projekt që ndodhë. Prandaj e tha edhe profesori ne e hapim këtë debat, nuk është ideja kundër askujt, është ideja që edhe shqiptarët e Maqedonisë të jenë të përfaqësuar në nivelin akademik”, tha Kasami.

“Ne me krerët  e komunave nuk kemi bërë asgjë tjetër veç se e zhvillojmë dialogun shoqërorë. Kjo ka të bëj me atë që të gjithë segmentet e shoqërisë të sensibilizohen  dhe neve të  na shohin si miq jo si armiq. Ne kemi pas përvoja të errëta në të kaluarën kur ka qenë universiteti  Tetovës dhe të gjithë kanë pas një rol diskutabil”, tha Hasan Jashari, kryetar i Shoqatës Akademike Shqiptare.