Të gjitha edukatoret dhe të gjithë të punësuarit në çerdhen “Mlladost” të Tetovës dhe komunave përreth kanë dalë negativ në skriningjet e bëra, nga ana e Qendrës për shëndet publik. Kështu për TV21 deklaroi drejtoresha e çerdheve në Tetovë, Ramije Dauti.
“Për fat të mirë të gjithë janë negativ dhe të enjten na u lajmëruan nga Qendra për shëndet publik dhe na treguan se nuk ka punëtor pozitiv në çerdhe. Ishte një lajm i mirë për çerdhen tonë pasi që do të jemi të gatshëm për punë në momentin kur ministria do të na japë leje”, tha drejtoresha Ramije Dauti.
Në kohë pandemie çerdhet janë duke u rinovuar. Dauti tregon se në çerdhen “Teteksi” punohet për fasadë të re, ndërsa poashtu janë duke i ndërruar të gjithë shtretërit.
Në shkollat e fillore ka filluar regjistrimi, ku nga 1200 nxënës sa pritet të regjistrohen deri më tani janë regjistruar rreth 450 prej tyre.
“Janë të regjistruar afër 450 nxënës në të gjitha 12 shkollat fillore dhe respektohen të gjitha protokollet për mbrojte të shëndetit ndaj profesorëve, nxënëseve dhe prindërve që janë duke ardhur për tu regjistruar”, deklaroi Ahmet Qazimi nga sektori i arsimit në Komunën e Tetovës.
Në shkollën fillore “Istikball” një mësuese ka dalë pozitiv dhe për këtë shkak si masë preventive në këtë shkollë është ndërprerë regjistrimi.
Çerdhet e Tetovës pritet të hapen më 15 qershor nëse numri i të infektuarve bie, ndërsa edhe kur të hapen, në çdo ardhje në çerdhe do të matet temperatura e fëmijëve dhe të punësuarve, hapësirat do të dezinfektohen vazhdimisht ndërsa fëmijët do të dalin për ajrosje më të shpeshta.