Në Tetovë situata vazhdon të jetë kritike me të infektuarit. Vetëm gjatë ditës së djeshme në spital janë shtruar edhe 15 pacientë të rijnë të infektuar me Covid-19 dhe numri i përgjithshëm shkon në 111 persona që marrin terapi me oksigjen në Tetovë, kurse shtatë persona nuk kanë mundur të fitojnë betejën me Covid-19 dhe kanë ndërruar jetë. Në 24 orët e fundit ndihmë mjekësore kanë kërkuar 192 pacientë me çka vetëm për 24 orë në Tetovë janë trajtuar 303 pacientë në pesë reparte mjekësore.
Por në anën tjetër numri i atyre që duan të vaksinohen është rritur dukshëm. Javën e fundit në Tetovë në ditë vaksinohen mbi 2000 persona. Mjeku Besnik Mustafai thotë se në Tetovë janë të gjithë llojet e vaksinave, ndërsa ata që kanë simptoma fillimisht duhet të konsultohen me mjekun amë.
“Javën e fundit kemi një interesim shumë të madh për tu vaksinuar kemi mbi 2 mijë pacientë për tu vaksinuar. Kemi mbi 2 mijë deri në 2500 pacientë çdo ditë në Tetovë dhe ky vaksinim zhvillohet në dy punkte në Tetovë, në sallën e shkollës së mjekësisë dhe në shtëpinë e shëndetit në Tetovë. Qytetarët që janë në dyshim se a duhet ta marrin vaksinën se janë më grip apo ndonjë simptomë fillimisht duhet të konsultohen me mjekun amë”, deklaroi Mustafai.
Në spitalin e Tetovës për tre javë rresht nuk kishte asnjë të shtruar në spital, ardhja e mërgimtarëve, organizmi i dasmave bëri që virusi të përhapet shumë shpejtë, dhe brenda tre javësh qyteti i Tetovës u shndërrua një vatër infektimesh. Në Tetovë për momentin kemi mbi 1100 raste aktive të të infektuarve , por mendohet se numri të jetë akoma më i madh pasi mjekët thonë se vetëm në përkeqësim të gjendjes shëndetësore qytetarët paraqiten në spital.