Përderisa gjatë viteve të kaluara Viti i Ri festohej me organizime të ndryshme, kësaj radhe ndërrimin e moteve qytetarët do ta presin në shtëpi.
Ruajtja e shëndetit dhe masat kundër virusit korona kanë ndalur ahengjet për këtë festë.
“U në nuk shkoj askund për shkak të pandemisë, më mirë në shtëpi me familjen”.
“Mendoj në shtëpi ta pres me familjen, xhepat janë të zbrazët nuk ka para për të dalë jashtë”.
“Në shtëpi me familjen, kohë pandemie le të kalojë në shtëpi më mirë”.
“Në shtëpi se ku tjetër, më mirë të qëndroj në shtëpi, se s’ke ku shkon”.
Ndërkohë nga policia njoftojnë se kontrollet do të jenë më të intesifikuara veçanërisht ato në lidhje me respektimin e vendimeve të Qeverisë për parandalimin e përhapjes së virusit korona.
“Në prag të festave të Vitit të Ri, Sektori për Punë të Brendshme Tetovë do të intensifikojë aktivitetet e kontrollit, veçanërisht ato në lidhje me respektimin e vendimeve të Qeverisë, masat dhe rekomandimet për parandalimin e përhapjes së virusit korona, dhe është planifikuar që fokusi i kontrolleve të jenë objektet hotelierike në këtë zonë, si dhe shtëpitë e pushimeve në Kodrën e Diellit dhe përreth Liqenit të Mavrovës. Do të kontrollohet orari i punës, por edhe ndalimi i grupimeve jashtë apo nëpër objekte, shtëpitë e pushimeve, etj”.
Ndryshe Komuna e Tetovës as nuk është stolisur për festat e Vitit të Ri, megjithatë ardhja e mërgimtarëve ka gjallëruar qytetin e Tetovës. Çdo ditë në komunikacion krijohen kolona ta gjatë të makinave.