TEC Manastir feston 40 vjetorin . Duhej të punonte 35 vite, por nëse mbyllet Maqedonia do mbetet pa rrymë!

Afati i tij i punës skadoi para pesë vjetëve, por TEC Manastir vazhdon të jetë kombinati më i rëndësishëm miniero-energjetik në vend, prej të cilit varet nëse banorët e Maqedonisë do të kenë energji elektrike.

“Më 4 nëntor të vitit 1982, në orën 23:53 u bë sinkronizimi me sistemin elektro-përçues të Jugosllavisë. Ky gjigant energjetik ka rëndësi të madhe për pavarësinë e Maqedonisë dhe sot është zemra e ekonomisë”, raporton gazetari Jovica Paunoski.

Sot, në Manastir për herë të parë u shënua kjo datë, me qëllim që, siç thanë nikoqirët, t’i falënderojnë TEC-it për punën që ka bërë gjatë këtyre 40 vjetëve për të gjithë qytetarët e vendit.

Edhe sot, në kushtet e krizës më të madhe energjetike botërore, TEC Manastir është prodhuesi dominues i energjisë elektrike në vend. Aktualisht, me angazhimin tonë të përbashkët, SH.A EMV, dhe në pjesën më të madhe TEC Manastir, siguron me sukses dhe në vazhdimësi 100% të energjisë elektrike të nevojshme për amvisëritë dhe konsumatorët e vegjël në vendin tonë, ku janë të punësuar shumica e punëtorëve tanë, tha kryeministri Dimitar Kovçevski.

Ne i marrim vendimet në Qeveri së bashku me kryeministrin Kovaçevski, duke u thirrur në analizat, punën dhe fjalën që na japin këta njerëz. Sot, vetëm për shkak të punës së këtyre njerëzve, punës së EMV-së, ne marrim vendime që do të ndikojnë në uljen e çmimeve të produkteve ushqimore. Do të ndikojnë që të mos rritet çmimi i ujit të pijshëm, vendime këto të cilat fatkeqësisht disa komuna tashmë i kanë sjellë. E për ta bërë këtë, duhej të rritej prodhimi i këtij kapaciteti 40-vjeçar, tha Kreshnik Bekteshi, ministër i Ekonomisë.

Nga organizata lokale e VMRO-DPMNE-së në Manastir, thonë se pas 40 vitesh ekzistencë, LSDM-ja ka arritur që për vetëm 4 vjet ta sjellë TEC Manastirin në kolaps. Shtojnë se do të dorëzojnë edhe padi penale.

“Nuk na befason ajo që fshihni nga qytetarët se çfarë karburanti përdorni që blloqet të mund të punojnë, cili është raporti i qymyrit dhe mazutit, kush e kontrollon dhe sa cilësor është ai mazut? Tregojuni manastirasve se sa e rritët nivelin e ndotjes duke zëvendësuar qymyrin me mazut? Ekocid – kjo është “njohuria dhe aftësia” juaj si banditë”, tha Goran Iskov nga VMRO-DPMNE.

Strategjia shtetërore për energjetikë parashikon riorientim drejt gazit dhe burimeve të ripërtëritshme të energjisë. Me këtë plan parashihet që TEC Manastiri të mbyllet gradualisht, subjekt i cili është fajtor për një pjesë të ajrit të ndotur që thithin banorët e Manastirit.

“TEC Manastiri ka tre blloqe, nga të cilat aktualisht në funksion janë dy. Njëra është në riparim pasi vitin e kaluar ndodhi aksident duke dëmtuar transformatorin. Plani i EMV-së është që edhe blloku i tretë të lëshohet në përdorim, sepse vendi shpresën për tejkalimin e krizës energjetike e sheh pikërisht në këtë gjigant energjetik, i cili prodhon mbi 80% të konsumit në Maqedoni”, raporton gazetari Paunoski.

Qindra metra larg ndodhet miniera e Suvodolit, prej ku TEC-i furnizohet me qymyr. Edhe pse me cilësi të dobët, sipas analizave, kanë mbetur edhe 10 vite për gërmim, e më pas kombinati do të duhet të mbyllet. Plani është që në të njëjtin vend të vendosen fotovoltaikë, si dhe një central gazi që do të prodhojë energji termike për qytetin e Manastirit.