“Të jesh i verbër në një shtet të verbër”, shënohet dita e “shkopit të bardhë”

“Shkopi i bardhë” është simbol i personave të verbër. Sot, kjo kategori qytetarësh feston ditën kur “Shkopi i bardhë” u bë simbol zyrtar. Në qytetin e Kërçovës ka rreth 100 persona të verbër ose me shikim të dëmtuar, të cilët e festojnë këtë ditë çdo vit. Megjithatë, në këtë qytet ata kanë pasur një zyrë me kushte të papërshtatshme, dhe që nga viti 2019 nuk e kanë më as atë.

“Jo, jo zyra e vjetër nuk ekziston sepse prej 2019 u prish dhe aktivitet i kemi mbajtur tek Kryqi i Kuq. Tani na kanë bërë premtime për te komuna e vjetër të na jap zyrë kryetari i Komunës, premtimet i kemi”, tha Zendel Zylbeari – kryetar i Shoqatës së të Verbërve.

Kryetari i Komunës, Fatmir Dehari, ka qëndruar pas këtij premtimi prej vitesh, duke siguruar se zyra për këtë kategori njerëzish është në proces rinovimi dhe do t’u dorëzohet së shpejti.

 “Ju kam premtuar dhe organizatave jo qeveritare ne jemi në rinovim e sipër të pjesëve të tjera të objektit të komunës së Kërçovës, në këtë rast objekti i vjetër është në rinovim e sipër pastaj edhe pjesët tjera në qytet, dje pardje kam pasur takim me zorin Zendel me kryetarin e shoqatës dhe në përfundim të rinovimit të objektit të komunës së vjetër, zyra i pret”, deklaroi Fatmir Dehari – kryetar i Komunës së Kërçovës.

Duhet theksuar se kjo kategori personash përballet me mungesë kushtesh jo vetëm në nivel lokal, por edhe në atë shtetëror. Ata janë të rrezikuar në rrugë dhe nuk kanë mbështetje të mjaftueshme për transportin publik. Megjithëse disponojnë disa libreza që u lejojnë të udhëtojnë, shumica e kompanive të transportit nuk i marrin parasysh, përveç njërës.

“Ka libreza por ata shfrytëzohen gjashtë herë në vit me gjithë shoqërues. Por nuk i marrin parasysh të gjitha kompanitë përveç Galebit. Kemi bërë reagim në Ministrinë për Transport dhe Lidhje dhe janë duke kryer verifikime, sepse ka pasur keqpërdorime, sepse një person ka marr tre ose katër libreza dhe e ka shfrytëzuar gjithë vitin”, u shpreh Zejno Bajrami – nënkryetar i Shoqatës së të verbërve në nivel republikan.

Edhe ndihma financiare mujore që këta persona marrin nga shteti është shumë e vogël, ndërsa edhe përkujdesësit e tyre paguhen me një shumë minimale. Për këtë arsye, ata kërkojnë kushte më të mira si infrastrukturore ashtu edhe financiare. Për më tepër, mungon një treg pune i përshtatshëm për këtë kategori njerëzish, që do t’u mundësonte atyre të jenë të pavarur ekonomikisht.