Ndihmë e targetuar për ata që u nevojitet më së shumti, lufta kundër ekonomisë gri, lufta kundër korrupsionit dhe ulja e shpenzimeve parafiskale të cilat në disa raste janë më të larta se tatimet – këto janë kërkesat kryesore të biznesmenëve deri te Qeveria. Të njëjtat sot u prezantuan në takimin e parë zyrtarë mes Lidhjes së Odave ekonomike dhe Qeverisë.
“Të gjithë ndërmarrjet dhe të gjithë ata në sektorin privat që po përballen me vështirësi financiare për shkak të krizës, të marrin ndihmë adekuate të targetuar e cila u nevojitet”, theksoi Daniella Arsovska, kryetare e LOE.
Qeveria është stabile, porositi kryeministri Zaev. Ai paralajmëroi ulje të shpenzimeve parafiskale deri në fund të mandatit.
“Tatimet duhet të jetë të qëndrueshme dhe të parapara, nëse ndodh çfarëdo ndryshimi në tatimet, kjo duhet të paralajmërohet në kohë. Synim i Qeverisë është që deri në fund të mandatit t’i shfuqizojmë së paku 75% e shpenzimeve parafiskale, njëkohësisht do të kemi edhe ulje të caktuar të tatimeve me qëllim të stimulimit të ekonomisë”, deklaroi Kryeministri i Maqedonisë së Veriut, Zoran Zaev.
Një nga punët e para të Qeverisë, siç tha Zaev, do të jetë edhe parandalimi i largimit nga puna e punëtorëve nga ana e punëdhënësve pas mbarimit të masës që e ofroi shteti për ruajtjen e vendeve të punës. Sipas tij në të ardhmen me shumë gjasa do të vazhdojë edhe përdorimi i Kartelave pagesore, për shkak se, siç tha Zaev, ata janë ndihmë e madhe për kategoritë me rrezik social.