“Tash e tutje gërmimet do të jenë super profesionale”/ Asllanaj ankohet për mungesë të financave dhe arkeologëve

Drejtori për Mbrojtjen e Trashëgimisë Kulturore, Arian Asllanaj siguron se gjurmimet në lokalitetin arkeologjik “Scupi antik” tash e tutje do të bëhen në mënyrën më profesionale të mundshme. Mbrëmë në “Click plus” e pranoi se për shkak të neglizhencës dhe mungesës së mjeteve ka ardhur deri te dëmtimi i disa epitafeve që janë gjetur në atë zonë.

“Besoni se prej nesër, pasi që është bërë shumë e madhe, do të jetë jo profesionalisht po super profesionalisht. Mirëpo tash është bërë dëmi! Çka të bëjmë tash prej “Sistinës” e diku 2-3 km gjithë ato varreza. Po janë ruajtur, ruhen të gjitha ato sarkofagë që i patë aty varrezat me mbishkrime, se ka edhe më interesant p.sh. “Arvanitus” me emra që janë edhe më burimore. Se këtu ka pasur gjithfarë fise”- deklaroi Arian Asllanaj, drejtor në Drejtorinë për Mbrojtje të Trashëgimisë Kulturore.

Asllanaj siguroi se epitafet të gjitha epitafet e gjetura do të ruhen për shkak se nuk janë guralecë që mund të fshihen nga dikush. Sipas tij i gjithë lokacioni i “Scupit” është në gjendje të mjerueshme për shkak të neglizhencës së institucioneve. Thotë se ai personalisht do t’i kishte ndërprerë gërmimet derisa nuk ka mjete për punë e financa të mirëfillta.

“Nëse më pyesni mua, unë personalisht do ta kisha ndaluar rreptësisht me ligj për momentin gërmimet arkeologjike. Përderisa nuk kemi mjete, financa.
-Në këtë lokalitet apo?
-Jo vetëm në këtë lokalitet po për gjithçka në shtet, sidomos për arkeologjinë. Po flas për mjete jo vetëm për financa e sidomos në arkeologji flas për mjetet të cilat janë pajisje e kështu me radhë, por edhe mëditje dhe vjen deri te kjo neglizhenca”.

Asllanaj u ankua edhe për mungesën e inspektorëve të cilët do të kontrollonin vendet e tilla. U ankua edhe për mungesa të arkeologëve shqiptarë në Drejtorinë që ai drejton. Sipas tij, problemi qëndron në rrogat e ulëta, që nuk i kalojnë 25 mijë denarë.